Nýr slökkvibíll til Eyja

- á eftir að verða algjör bylting í störfum slökkviliðsins og auka öryggi og getu liðsins til mikilla muna

12.Mars'18 | 08:54

Nýi körfubíllinn. Ljósmynd/Facebooksíða Slökkviliðs Vestmannaeyja

Slökkvilið Vestmannaeyja hefur bætt tækjakost sinn verulega. Gengið var frá kaupum á fyrsta körfubíl slökkviliðsins á dögunum.

Bíllinn, sem er Scania P94, árgerð 2000 er með 32m Bronto lyftibúnaði og hefur verið í þjónustu slökkviliðsins í Sundsvall í Svíþjóð þar til hann var seldur hingað til Eyja, segir á facebook-síðu slökkviliðsins.

Vinna stendur nú yfir við að gera körfubílinn kláran. Búið að fjarlægja allar gamlar merkingar, skipta út tengjum og þvo og hreinsa fyrir mössun og bón. Nýjar merkingar eru í vinnslu og svo nýskráning síðar í mánuðinum. Framundan eru æfingar og kennsla og svo formlega vígsla á tækinu. Þá segir í facebook-færslunni að þetta eigi eftir að verða algjör bylting í störfum slökkviliðsins og auka öryggi og getu liðsins til mikilla muna. Nú vantar bara nýja slökkvistöð, segir í niðurlagi færslunnar.