Fréttatilkynning:

Hollvinasamtök Hraunbúða styrkt myndarlega

- ágóðinn frá Vestmannaeyjahlaupinu og Kótilettukvöldinu renna til samtakana

2.Nóvember'17 | 11:02

Frá afhendingu ágóða Vestmannaeyjahlaupsins. Myndir/aðsendar.

Hollvinasamtök Hraunbúða hafa verið svo heppin að aðstandendur Vestmannaeyjahlaupsins og Kótilettukvöldsins ákváðu að ágóði þeirra verkefna í ár myndu renna til samtakanna. Þessi stuðningur er ómetanlegur fyrir starfsemina og hjálpar okkur að gera betur.

Við viljum nota tækifærið og þakka því frábæra fólki sem að þessum tveimur verkefnum standa innilega fyrir þeirra hlýhug og stuðning.

Hollvinasamtökin voru stofnuð í byrjun árs og síðan hefur stjórn ásamt fleiri velunnurum unnið að því að koma starfseminni af stað. Það er ótrúlegt hvað samtakamáttur Eyjamanna er mikill og við höfum svo sannarlega fengið að kynnast honum og hjálpsemi þeirra.

Það gleður okkur að geta sagt frá því að með hjálp styrktaraðila okkar hafa verið fest kaup á tveimur nýjum hjólastólum sem verða afhentir Hraunbúðum í næstu viku. Næst á dagskrá er að festa kaup á lífsmarkamæli og verður það gert á næstu vikum. Það er margt spennandi framundan í starfsemi samtakanna en þar má nefna sunnudagsbíltúra, Þrettándakaffi, bingó fyrir heimilisfólk og aðstandendur, vinna við nýtt aðstandendaherbergi og fleira.

Ef einhverjir vilja gerast styrktaraðilar er hægt að senda okkur póst á facebook síðu okkar eða fara inná hollvinur.is og skrá sig sjálfur. Ársgjaldið er 2500,- kr. Við viljum taka fram að að þeir fjármunir sem safnast með ársgjaldinu fara eingöngu í kaup á tækjum eða búnaði fyrir Hraunbúðir. Allt sem viðkemur Vorhátíð, Þrettándakaffi, sunnudagsbíltúrum eða öðru þess háttar er unnið í sjálfboðastarfi.

Án styrktaraðila væri þetta ekki hægt. Takk fyrir að láta ykkur varða málefni Hraunbúða. segir í tilkynningu frá hollvinasamtökum Hraunbúða.