„Ekki gleyma mér”

Ja, afhverju ég ákvað að skrifa bók. Það er ekki neitt eitt svar við þeirri spurningu. Þessi bók er búin að vera í vinnslu í nokkur ár og það er ekki svo langt síðan að ég ákvað að setja kraft í að klára verkið.

Innihaldið er byggt á minningum mínum um mjög svo áhrifamikinn tíma ævi minnar þegar ég var námsmaður í Leipzig í gamla Austur-Þýskalandi, landi sem lagt var niður fyrir rúmlega 25 árum.

Var hann ef til vill ómerkilegur njósnari?

Aðspurð segir Kristín að bókin segi frá því hvernig var að að búa í einræðisríki með tilheyrandi boðum, bönnum og leyniþjónustu. Í bókinni leitar Kristín svara við spurningum sem höfðu plagað hana lengi. "Voru einhverjir vina minna á þessum tíma á mála hjá austur-þýsku leyniþjónustunni og hvað var með kærastann minn, sem hvarf fyrirvaralaust. Var hann ef til vill ómerkilegur njósnari?"

,,Bókin kallar fram stemninguna og tíðarandan við þessar óvenjulegu aðstæður í landi sem nú heyrir sögunni til. Það er mikill styrkur að ég hélt dagbók og því gat ég lýst hlutum nokkuð nákvæmlega án þess að vera sífellt að geta í eyðurnar eins og oft vill vera þegar fólk er að rifja upp eitthvað sem er löngu liðið.” 

Verðmætt að eiga þessa óvenjulegu fortíð

Kristín segist hafa fengið mikla hvatningu frá fólki sem aðeins þekkti til þessarar sögu hennar og nú er þetta verk orðið að veruleika.

,,Bókin er mjög persónuleg, en mér finnst verðmætt að eiga þessa óvenjulegu fortíð og geta rifjað upp aðstæður sem eru flestum hér á landi algjörlega framandi” segir Kristín.

„Ekki gleyma mér” verður kynnt af höfundi á Safnahelginni sem hefst í dag - fimmtudaginn 2. nóvember. Kynning er kl. 17:30 í Sagnheimum í Safnahúsinu og eru allir hjartanlega velkomnir.