Sigurmundur G. Einarsson skrifar:

Hið „nýja“ Ísland. Viljum við það?

- er búinn að fá nóg af hagsmunapoturunum sem kippa í spottana og telja sig geta vaðið yfir allt og alla þegar þeim hentar

9.Ágúst'17 | 15:27
Simmi_viking

Sigurmundur G. Einarsson. Mynd/TMS.

Undanfarna daga hef ég fylgst með baráttu bæjarstjórnar Vestmannaeyja, með dyggri aðstoð samgönguráherra, fyrir bættum samgöngum milli Landeyjahafnar og Heimaeyjar. 

Gaman er að sjá þegar pólitíkin fer á tilfinningasviðið og berst fyrir því sem helst mætti kalla „vind í vatnsglasi“ og hefur sigur! Eimskip er fórnarlambið sem bjarga varð. Það hafðist í gegn með „aðlögun“ fyrir séríslenskar aðstæður á Evrópureglugerð 666/2001EU sem gildir í allri Evrópu. Ráðherrann gaf leyfi til tveggja daga siglinga ferjunnar Akraness milli lands og Eyja, en ferjan kom til landsins vegna tilraunaverkefnis varðandi siglingar milli Akraness og Reykjavíkur.

Enn og aftur hefur ráðherra gengið í gegnum eldinn fyrir Eimskip. Áður var búið að berja í gegn breytingar á skilgreiningu hafsvæðisins milli lands og Vestmannaeyja. Það var fært úr B-flokki, sem nær yfir úthaf, í C-flokk en undir hann falla firðir með lygnari sjó en úthafið. Þetta var gert til þess að nokkrir milljónatugir gætu runnið í sjóði Eimskips sem leiga fyrir flóabátinn Baldur.

Leyfið fyrir Akranesferjuna til siglinga milli Landeyjahafnar og Heimaeyjar var veitt þvert á ákvörðun Samgöngustofu. Hún gaf ekki leyfi því ferjan uppfyllir ekki skilyrði reglugerðar. Samgöngustofa er fagstofnun sem hefur það hlutverk að úthluta leyfum af þessu tagi. Hún sér um faglega úttekt á loftförum, sjóförum og landfarartækjum landsmanna. Spyrja má hvort ráðherrann hafi hugsað sér að taka að sér verkefni stofnunarinnar? Ég þykist vita að á bakvið tjöldin hafi snyrtilega klæddir gæslumenn hagsmunaafla þrýst mjög á að gefinn yrði afsláttur af reglunum. Þessir hagsmunagæslumenn haga sér eins og þeir eigi Ísland skuldlaust.

Ég rek ferðaþjónustufyrirtækið Viking Tours í Vestmannaeyjum. Það gerir út tvo farþegabáta og rútur. Við keyptum stærri bátinn 2013 og hugsuðum hann m.a. til siglinga í Landeyjahöfn. Minni báturinn hafði á árum áður leyfi til siglinga milli Vestmannaeyja og Þorlákshafnar að sumarlagi, en var sviptur því þegar Landeyjahöfn var opnuð. Þáverandi Siglingastofnun, nú Samgöngustofa, gaf engan afslátt af kröfum um útbúnað stóra bátsins til siglinga á B-svæði og þurftum við að taka á okkur tugmilljóna króna kostnað svo báturinn uppfyllti kröfurnar. Enginn ráðherra gaf okkur undanþágu og ekki heyrðum við bæjaryfirvöld í Vestmannaeyjum krefjast þess að við fengjum afslátt af kröfum gildandi reglugerða. Er ekki eitthvað til sem heitir jafnræðisregla?

Sú hugsun hefur sótt á mig hvort þetta sem við höfum nýverið orðið vitni að sé það „nýja Ísland“ sem flest okkar vilja sjá? Það eru sveitarstjórnarkosningar á næsta ári. Eigum við, almenningur í landinu, ekki að láta heyra í okkur? Viljum við breyta til? Ég er búinn að fá nóg af hagsmunapoturunum sem kippa í spottana og telja sig geta vaðið yfir allt og alla þegar þeim hentar. Ég spyr: Eigum við ekki að krefjast sama réttlætis og jafnræðis fyrir alla? Græðgin er óseðjandi og mun alltaf heimta meira.

 

Sigurmundur G. Einarsson

Viking Tours Vestmannaeyjum

Hverja viltu sjá sem fulltrúa Vestmannaeyja 2018-2022?

2.Ágúst'17

Hverja vilt þú sjá bjóða sig fram í sveitastjórnarkosningum næstkomandi vor?
Taktu þátt í könnun Eyjar.net. Smelltu hér.
 

Grindavik.net

21.Júní'16

Grindavik.net er fréttavefur með áherslu á efni tengt Grindavik. Sjón er sögu ríkari.

ÚV á FM 104

23.Apríl'16

Góð tónlist flesta laugardaga og sunnudaga frá 16:00. Einnig eru pistlar frá Nice. ÚV á FM 104

Smáauglýsingar

Hér getur þú með einföldum hætti auglýst það sem þú þarft að koma á framfæri allt frá einum sólarhring uppí einn mánuð. Einfaldur greiðslumáti Þú greiðir fyrir auglýsinguna með kreditkorti. Verð kr. 500,- per sólarhring. Um auglýsinguna Stutt fyrirsögn, hámark 35 tákn. Hnitmiðaður texti, hámark 130 tákn. Mynd á JPG sniði, verður sköluð í 130x100 díla (pixel).