Fréttatilkynning:

Einleikurinn Gísli á Uppsölum sýndur í Kviku

1.Júní'17 | 15:30
Gisli a Uppsölum

Gísli á Uppsölum. Mynd/aðsend.

Á laugardaginn næstkomandi verður einleikurinn Gísli á Uppsölum sýndur í Kviku. Tvær sýningar verða, annars vegar kl. 16.00 og sú síðari kl. 20.00. Miðaverð er 2.000 kr. Gísli á Uppsölum er einstakt leikverk um einstakan mann í uppfærslu Kómedíuleikhússins. 

Einn stærsti viðburður íslenskrar sjónvarpssögu er Stiklu þáttur Ómars Ragnarssonar um einbúann Gísla Oktavíus Gíslason. Enn er Gísli landanum kær og hugleikinn. Hér er á ferðinni áhrifamikil sýning sem hefur hrifið áhorfendur líkt og saga söguhetjunnar.

Leikurinn hefur fengið lofsamlega dóma, m.a:

"Það er hlýja og heiðarleiki í túlkun Kómedíuleikhússins á lífi þessa fræga nærsveitunga. Leikhúsaðferðir eru valdar af kostgæfni og þeim beitt af öryggi. Útkoman er falleg og snertir mann. Þannig á það að vera." ****
Morgunblaðið - Þorgeir Tryggvason

,,Elfar Logi er einstaklega sannfærandi í hlutverki Gísla og málar upp mynd af manninum af virðingu.
Einleikurinn um Gísla á Uppsölum er næmt og fallegt verk sem snertir við áhorfendum. Viðfangsefninu er sýnd virðing og verður til þess að Gísli fær að að ferðast um landið eins og hann hafði sjálfur viljað."

Víðsjá - Halla Þórlaug Óskarsdóttir

„Frábær og hnitmiðaður flutningur, góðar umræður eftir sýninguna um örlög þessa einstaklings Gísla á Uppsölum, sem lenti í einelti strax í barnaskóla, missti af ástinni, fannst hann ekki geta brugðist móður sinni, lifði í vernduðu umhverfi allt sitt líf, lét hverjum degi nægja sína þjáningu, og lifði alla ævi í einsemd án nokkurra lífsgæða.“
Magnús Ólafsson, Feykir

,,Kómedíuleikhúsið hefur á undanförnum árum unnið mikilvægt þrekvirki þegar kemur að því að efla og lífga menningu, ekki einasta á landsbyggðinni heldur á landinu öllu. Elfar Logi hvílir ákaflega vel og fallega í karakter Gísla á Uppsölum sem og hverju andartaki sýningarinnar. Lögn hans á karakter Gísla gengur fullkomlega upp í hverju smáatriði og í heild er leikur hans unaðsleg stúdía í list leikarans, öll hans vinna ber vott um vandaða vinnu, heiðarleika og einlægni."
Kvennablaðið - Jakob S. Jónsson

,,Sýningin hrífur jafnt tilfinningalega og vitsmunalega og göfgar hvort tveggja, hræringar í sál og anda og starfsemi hugarins. Þetta gerir hún vegna þess hve hún er yfirlætislaus og unnin af sannri þrá listamanna til þess að skapa listaverk.
Sýningin á Gísla á Uppsölum er samin og samsett af trúmennsku og og ást af viðfangsefninu, auk mikillar þekkingu og reynslu leikara og leikstjóra á list leikarans og þeim einföldu miðlum leikhússins sem oft verða áhrifamestir."

Starafugl - Trausti Ólafsson

,,Í einleik þeirra Elfars Loga og Þrastar Leós Gunnarssonar, sem annast sviðsetningu og leikstjórn, er brugðið upp svipmynd af undarlegu lífi mannsins, brotakenndri mynd en þó einkennilega heillandi; mynd sem vekur miklu fleiri spurningar en hún svarar og býr yfir dýpt sem veldur því að hún leitar á mann löngu eftir að leik er lokið."
Fréttatíminn - Jón Viðar Jónsson

Leikari: Elfar Logi Hannesson
Höfundar: Elfar Logi Hannesson, Þröstur Leó Gunnarsson
Dramatúrg: Símon Birgisson
Tónlist: Svavar Knútur
Lýsing: Magnús Arnar Sigurðsson
Leikstjórn: Þröstur Leó Gunnarsson

Áhorfendur segja:

,,Mæli svo með þessari sýningu, látið ekki Gísla á Uppsölum hlaupa frá ykkur."

,,Stórkostlegt einu orði sagt!"

,,Þessi sýning kom við allan tilfinningaskalann."

,,Mæli hiklaust með sýningunni sem er allt frá því að vera afar sorgleg upp í bráðskemmtileg."

,,Gísli á Uppsölum. Dásamleg sýning. Þið skuluð alls ekki missa af henni ef hann kemur nærri.

,,Fór á alveg brilliant leiksýningu áðan! Það var einleikurinn Gísli á Uppsölum sem um ræðir og mæli ég eindregið með henni! Það var bara allur tilfinningaskalinn á ferð held ég! Frábær leikari hann Elfar Logi......"

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Lumar þú á grein?

15.Febrúar'18

Endilega sendu okkur hana á eyjar@eyjar.net. Eyjar.net - fyrir alla. 

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.