Gullberg VE selt úr landi

16.Febrúar'17 | 15:04

Gullberg VE 292.

Skip Vinnslustöðvarinnar, Gullberg VE verður selt úr landi í sumar. Sigurgeir Brynjar Kristgeirsson segir í samtali við Eyjar.net að skipið fari til Noregs og er reiknað með afhendingu í júlí / ágúst – en þá verður Breki VE vonandi kominn í drift.

Líkt og lög gera ráð fyrir var skipið fyrst boðið til sölu Vestmannaeyjabæ en erindi frá Vinnslustöðinni var tekið fyrir í bæjarráði í dag.

Þar er Vestmannaeyjabæ boðinn forkaupsréttur að Gullbergi VE. í samræmi við ákvæði 12.gr. laga nr. 116/2006 um stjórn fiskveiða. Í erindinu kemur fram að skipið sé selt ásamt öllu fylgifé, tækjum og búnaði sem skipinu fylgir og tilheyrir. Skipið hefur leyfi til veiða í atvinnuskyni en engin aflahlutdeild eða aflamark eða aðrar veiðiheimildir munu fylgja skipinu við söluna.

Bæjarráð þakkar VSV fyrir upplýsingarnar og tilboð um forkaupsrétt þann sem kveðið er á um í lögum um stjórn fiskveiða í þeim tilgangi að skapa sátt um sjávarútveg. Bæjarráð telur hinsvegar ekki forsendur fyrir því að nýta forkaupsréttinn í þessu tilviki og fellur því frá honum, segir í bókun ráðsins.