Lóa Baldvinsdóttir skrifar:

Dagur leikskólans

6.Febrúar'17 | 08:10

Í 17 ár hef ég unnið á leikskóla. Tók mér hlé til þess að mennta mig sem leikskólakennari og tók mér líka hlé til þess að eiga yngri stelpuna mína. Frá fyrsta degi hef ég elskað að vinna á leikskóla. 

Ég elska að fylgjast með litlum krílum koma úr foreldrafangi, lítil, brothætt og viðkvæm og á örskotsstundu breytast þau í sjálfstæða, duglega, stóra krakka sem víla ekkert fyrir sér. Ég elska að fylgjast með börnum uppgötva heim ævintýra og frásagna,sjá þau spennast upp þegar risinn er alveg að ná Jóa, sjá þau tárast þegar Dimmalimm finnur svaninn sinn dáinn og sjá þau veltast um af hlátri þegar Fróði fretar. 

Ég elska að spjalla við þessa litlu snillinga sem hafa svo réttláta og dásamlega sýn á lífið. Fyrir þeim eru allir jafnir, fyrir þeim eiga allir sama rétt á lífi og fyrir þeim eru allir verðugir þess að fá að vera með. Vá hvað við fullorðna fólkið getum lært mikið af þessum mögnuðu einstaklingum.  Ég elska að hoppa, syngja og dansa með þeim, elska að kúra með þeim í hvíldinni og finna litlar hendur læðast í lófann minn.

Ég elska að fara út að leika með þeim í snjónum og sjá svipinn á þeim þegar þau renna sér á rassaþotu í fyrsta skipti, fyrst er hræðsla í svipnum en svo ofsaleg gleði og mikið stolt þegar þau koma heil niður brekkuna. Ég elska að borða með þeim hádegismat og hlusta á heimspekilegar umræður um dreka, tröll, konungsdætur, afa og ömmur sem hrjóta, skrýtin hljóð sem koma úr svefnherbergjum foreldra og stóra maga á uppáhalds frænkum. 

Það eru svo ótrúleg forréttindi að eiga hlutdeild í lífi svona margra yndislegra lítilla sála. Það eru forréttindi að fá að fylgja þeim fyrstu skrefin í lífinu . Það eru forréttindi að gegna svona veigamiklu hlutverki í lífi þessara snillinga og vera um tíma þeirra helsta fyrirmynd, vinur, uppalandi og kennari.

En forréttindunum fylgir mikil ábyrgð, sú ábyrgð hefur stundum fyllt mig hræðslu þar sem mér finnst svo magnað að foreldrar treysti mér fyrir því mikilvægasta sem þau eiga. Ég hef reynt að standa 100% undir þessu trausti og ábyrgð og geng alltaf til minna starfi af lífi og sál.

Ég er  svo heppin að stelpurnar mínar tvær byrjuðu sína skólagöngu í yndislegum leikskólum. Þangað fóru þær glaðar á hverjum einasta degi og yfirleitt þurfti ég að múta þeim til að fá þær heim alla daga. Þær elskuðu skólana sína og starfsfólkið þeirra. Eldri dóttir mín  var ansi hress og dugleg og þurfti mikið að hafa fyrir henni en alla daga var tekið á móti henni með brosi á vör og gleði yfir að hún væri mætt. Hún er 18 ára í dag og ennþá spyr starfsfólkið um hana þegar við hittumst á förnum vegi. Þær búa enn að öllu því sem þær lærðu í leikskólunum sínum og án þessara ára held ég að líf þeirra væri fátækara, þær lærðu svo mikið.

Í dag er Dagur leikskólans, mig langar að biðja ykkur að hugsa hlýtt til leikskólastarfsmanna í dag. Hugsið til þeirra sem hugsuðu um ykkur á ykkar leikskóla, rifjið upp allt sem þið lærðuð og allt sem þið upplifðuð. Innilega til hamingju með daginn allt leikskólastarfsfólk, við rokkum og án okkar væri framtíð þessa lands fátækari. Hæ fæv á okkur smiley

Ykkar Lóa smiley

 

Hefur þú hugmynd?

20.Apríl'17

Lumar þú á hugmynd fyrir Eyjar.net? Til að gera vefsíðuna betri. Endilega sendu okkur línu á eyjar@eyjar.net!

Íbúð til Orlofsleigu í sumar

12.Júní'17

Stór íbúð á góðum stað í Eyjum til orlofsleigu í sumar. Gistipláss fyrir 6-8 manns Íbúðin telur 2 svefnherbergi, 2 stofur, stórt eldhús og baðherbergi. Innan við 500 metrar á Slippinn 😊. Laus ennþá yfir  Goslok 😊  (Pæjumót-Orkumót og Þjóðhátíð bókuð)   Áhugasamir sendi fyrirspurn á gummiv@simnet.is

ÚV á FM 104

23.Apríl'16

Góð tónlist flesta laugardaga og sunnudaga frá 16:00. Einnig eru pistlar frá Nice. ÚV á FM 104