Leikið í gamla salnum í kvöld

Dúkurinn á nýja salnum er orðinn gamall og þar af leiðandi stamur og harður sem eykur álag á liði og liðamót

25.Nóvember'16 | 11:08

Gamli salur Íþróttamiðstöðvarinnar.

Á facebook-síðu ÍBV segir að ákveðið hafi verið að spila leikinn á móti FH í gamla salnum. Þar segir ennfremur að þessi ákvörðun hafi ekki verið auðveld en að hún sé nauðsynleg og fyrst og fremst tekin með hagsmuni leikmanna í fyrirrúmi.

Gólfið á nýja salnum sem tekinn var í notkun 2001 er lagt dúk, sem kominn er á tíma. Dúkurinn er orðinn gamall og þar af leiðandi stamur og harður sem eykur álag á liði og liðamót. Það er mikið álag á leikmönnum, margir leikir og þétt spilað og því miður eru leikmenn lengi að jafna sig eftir leiki á dúknum og í raun töluvert lengur en leiki sem leiknir eru á útivöllum.

Á móti kemur að aðstaða fyrir okkur frábæru stuðningsmenn er ekki góð í gamla salnum en við vonum að þeir standi með okkur í þessu og sýni skilning á þessari ákvörðun. Þétt setinn gamli salurinn er svakaleg gryfja og er ekkert lið öfundsvert af því að koma og spila þar með ykkur, okkar frábæru stuðningsmenn á pöllunum, segir að endingu í tilkynningunni.