Yfirlýsing frá ráðsmönnum í fráfarandi knattspyrnuráði ÍBV

18.Október'16 | 13:23

Þriðjudaginn 5. október kl. 21.47 sendi Dóra Björk framkvæmdastjóri ÍBV íþróttafélags tölvupóst til okkar í nafni stjórnar félagsins. Tölvupósturinn er svohljóðandi:

Knattspyrnuráð karla

 
Á fundi aðalstjórnar ÍBV íþróttafélags í dag var m.a. fjallað um skipan nýs knattspyrnuráðs meistaraflokks karla fyrir næsta keppnistímabil. Fyrir lá tilkynning Óskars Ólafssonar til formanns og framkvæmdastjóra félagsins frá því í ágúst þess efnis að hann gæfi ekki kost á sér til áframhaldandi formennsku. Stjórnin hefur nú skipað Pál Hjarðar Almarsson til að gegna formennsku í knattspyrnuráðinu á næsta tímabili og mun hann nú vinna að tillögum um skipan ráðsins að öðru leyti, sem síðan verða bornar undir aðalstjórn.

Fyrir hönd aðalstjórnar ÍBV íþróttafélags,
Dóra Björk

 

Morguninn eftir miðvikudaginn 6. október kl. 09.05 voru send eftirfarandi skilaboð frá okkur til aðalstjórnar:

Sæl Dóra og meðlimir aðalstjórnar

Nú komum við flestir af fjöllum sem erum í ráðinu í dag.

Er með þessu verið að setja ráðið af?  Ef svo, hefði ekki verið eðlilegra, sanngjarnara og réttara að gera það með öðrum hætti?

Ef ekki er verið að setja ráðið af, hvernig eigum við að lesa í þennan gjörning og hverju á hann að skila?

Við erum í miðri vinnu við að ræða við leikmenn sem þarf að ræða við vegna samninga þeirra við deildina, hvernig standa þau mál?  Sama á við um þjálfaramál?

Það er alls ekki æskilegt að sú vinna stoppi eða henni seinki um margar vikur. 

Ég tel bæði eðlilegt og rétt að frekari útskýringar komi frá aðalstjórn vegna þessarrar tilkynningar og einhvernveginn finnst mér þeir einstklingar sem þetta var sent til eiga skilið að fá betri útskýringar.  Menn eru algjörlega í lausu lofti.

Með vinsemd.

Kær kveðja
Bjarni Ólafur – Daddi

 

Aðalstjórn boðaði fund þann sama dag kl. 12.15 með okkur en án Óskar Arnar Ólafssonar fyrrverandi formanns, sem var þá staddur erlendis, og Hannesar Gústafssonar varaformanns sem var fjarverandi.  Á þeim fundi fengust engin svör við ofangreindum spurningum aðeins að aðalstjórn hefði borið skylda til að skipa nýjan formann.  Á þeim fundi var bæði fullyrt og ýjað að hlutum af hendi aðalstjórnar sem halda ekki neinum rökum, og eru í raun hrein ósannindi. Taka ber þó fram að aðalstjórn hefur enn ekki ritað fundargerð fyrir þennan fund, þrátt fyrir ábendingar frá okkur þar um.

Við sem þessi ákvörðun beinist að höfum enn þann dag í dag ekki fengið neinar skýringar frá aðalstjórn fyrir þessari ákvörðun.  Það að formaður hafi ákveðið að hætta er ekki nýtt hjá ráðum og deildum félagsins, og þá hafa ráðin sjálf séð um að skipta með sér verkum að nýju sem og að fá nýtt fólk inn ef svo ber undir.  Við höfum haft frumkvæði við aðalstjórn að ná fram sáttum en ekki fengið undirtektir.

Í fyrirsögn fréttatilkynningar aðalstjórnar er tilgreint „að enginn hefur verið rekinn úr knattspyrnuráði“.  Það er engan veginn hægt að vera sammála þeirri skýringu og er hún því röng. Við förum fram á skýringar á því hvers vegna þessi ákvörðun var tekin, hvers vegna aðalstjórn ræddi ekki við okkur áður en ákvörðun var tekin og færð rök fyrir þeirri ákvörðun.

Framganga aðalstjórnar ÍBV er algerlega fráleit og taka ber fram að aðalstjórn boðaði fyrra knattspyrnuráð aldrei til fundar vegna þessa máls, eins og lög félagsins segja til um.

Undanfarna daga hafa stjórnarmenn aðalstjórnar haft sig mjög í frammi við að hringja í ýmsa aðila sem ýmist hafa starfað fyrir knattspyrnudeildina eða eru styrktaraðilar, og gert lítið úr okkar störfum. Það eru óásættanleg vinnubrögð og hvers vegna svo er, hljóta að teljast undarleg vinnubrögð að hálfu þessara stjórnarmanna.

Við förum fram á að aðalstjórn ÍBV íþróttafélags biðji okkur afsökunar bæði persónulega og með opinberri yfirlýsingu  á því hvernig staðið var að málum og hreinsi þær sögusagnir sem hafa verið í gangi vegna þessa máls.  Það er félaginu til framdráttar.

Við erum sjálfboðaliðar sem höfum lagt okkur alla fram að vinna að hag félagsins okkar. Það að meðhöndla okkur á þann hátt sem raun ber vitni, er einsdæmi hjá félaginu og félaginu ekki til framdráttar.

Við erum gildir og góðir félagsmenn, eigum börn sem eru og hafa verið þátttakendur  í starfi félagsins og erum einnig eigendur í félaginu ásamt öllum öðrum félagsmönnum. Við viljum minna á að það eru félagsmenn sem eiga félagið en ekki sú aðalstjórn sem situr hverju sinni.

Að endingu óskum við nýju knattspyrnuráði farsældar í sínum störfum.

 

Áfram ÍBV, alltaf og alls staðar

 

Ráðsmenn í fráfarandi knattspyrnuráði ÍBV:

Bjarni Ólafur Guðmundsson

Hjálmar Jónsson

Ingi Sigurðsson

Jóhann Sveinn Sveinsson

Jónas Guðbjörn Jónsson

Óðinn Sæbjörnsson

Ólafur Björgvin Jóhannesson

Örn Hilmisson

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Lumar þú á grein?

15.Febrúar'18

Endilega sendu okkur hana á eyjar@eyjar.net. Eyjar.net - fyrir alla. 

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is