Fær bætur vegna líkamsleitar á Þjóðhátíð

6.Október'16 | 22:35

Héraðsdómur Reykjavíkur dæmdi ríkið til þess að greiða karlmanni 120 þúsund krónur í miskabætur fyrir líkamsleit á manninum á Þjóðhátíð í Vestmannaeyjum á síðasta ári.

Maðurinn neitaði að heimila lögreglu að leita á sér en fíkniefnahundur var með í för og hafði merkt manninn og gaf þannig til kynna að maðurinn gæti haft fíkniefni í fórum sínum.

Maðurinn reyndist ekki vera með nein fíkniefni á sér heldur 300 spjöld í nafni borgarasamtakanna Snarrótar, sem eru samtök um borgaraleg réttindi.

Maðurinn byggði mál sitt á því að þvingunarráðstafanir lögreglu, þ.e. handtaka og líkamsleit, hefðu verið að ósekju og ólögmætar. Hann taldi sig því eiga rétt á bótum úr hendi ríksins, sem og Héraðsdómur Reykjavíkur viðurkenndi í gær.

Samtökin Snarrót hafa mótmælt handahófskenndum líkamsleitum lögreglu á einstaklingum.

Ríkið hélt því fram að maðurinn ætti ekki rétt á bótum þar sem hann hefði synjað lögreglu um að leita á sér. Því var dómari ósammála og því var ríkinu gert að greiða honum 120 þúsund en maðurinn fór fram á eina milljón í bætur.

Fréttatíminn.is greindi frá.