Lóa Baldvins skrifar:

Það er svo næs að flatmaga við sundlaugarbakkann......... eða er það??????

4.Október'16 | 07:31

Ég er ofsalega mikið laus við það að vera spéhrædd og finn sjaldan fyrir einhverjum hégóma hvað útlit mitt varðar. Auðvitað á ég stöku dag þar sem ég vil helst vera í flónel-náttfötum undir sæng svo engin sjái hvað ég er hræðilega útlítandi, en það gerist afar, afar sjaldan.

Oftast nær klæðist ég nákvæmlega því sem mér finnst þægilegt og flott og fylgi nánast aldrei neinum tískustraumum, ef það gerist þá er það yfirleitt alveg hrikalega mikið óvart. Ég fer alveg í þröngt þó að aukakílóin bjóði ekkert endilega upp á það, mér er sjitt sama og ég er bara alveg í kjól sem leyfir efri maganum að njóta sín.....og jafnvel þeim neðri ef því er að skipta. Ég fer líka alveg í hlírabol og leyfi bingóinu að ganga lausu og munstur og litir hafa aldrei hrætt mig neitt, ég er meira í vandræðum með hvað passar saman og svona. Það er kannski þess vegna sem mamma mín sagði einu sinni við eldri dóttur mína þegar ég rigsaði niður Heiðarveginn ,,Jesús minn, hún móðir þín er alveg eins og illa skreytt jólatré“

Það er þó einn staður í heiminum sem ég fer helst ekki á, staður þar sem ég finn fyrir svo mikilli spéhræðslu og minnimáttarkennd að mig langar næsum því að gráta. Sundlaugar eru staðir sem mér líður svo illa á og þar finnst mér ég svo hræðilega berskjölduð, ljót og feit að helmingurinn væri miklu meira en nóg. Ég hef oft velt fyrir mér af hverju mér líður svona, og ekki bara mér, því  margar konur í mínu lífi hafa tjáð sig um hvað þeim líður illa í sundi(konur segi ég því ég hef bara hreinlega ekki rætt þetta mál við karlmennina í mínu lífi).

Í huganum er ég komin í 7.bekk, lítil, ljóshærð, vandræðalega hvít á hörund og aukakílóin ekki farin að flækjast fyrir mér, hvorki efri né neðri magi að láta ljós sitt skína....meira svona innfallinn magi. Ég var aðeins farin að fá brjóst þó svo að minningin gefi ekki alveg rétta mynd af stærð þeirra þar sem ég hef séð myndir af mér á þessum árum og þetta voru meira svona geirvörtur á hormónum heldur en nokkurn tímann brjóst. En í huga mínum þarna var ég eins og Dolly Parton á sterum.

Ég er á leiðinni í skólasund með bekkjarfélögum mínum, ég er leeeeengi undir heitri sturtunni að laga fjandans sundbolinn. Passa að hann liggi rétt, toga hann eins hátt og ég get svo ,,brjóstin“ poppi ekki út, toga hann milljón sinnum niður fyrir rassinn svo þessi líka risastóri rass reyni ekki að gleypa bolinn. Kennarinn flautar og ég neyðist undan sturtunni og fram í salinn, þar sest ég skjálfandi á beinunum á bekkinn, skjálftinn er bæði vegna kulda og hræðslu yfir renna á blautum bakkanum. Ég sest á bekkinn og að sjálfsögðu er ég svo gríðarlega heppinn að strákurinn sem ég er yfir mig hrifinn af, er næstur mér í stafrófinu, svo hann sest við hliðina á mér og ber og blaut lærin okkar klessast saman. Já, já þetta hljómar allt rosa rómó en trúiði mér, rómantík er það síðasta sem fer í gegnum höfuð mitt. Nei ég er skelfingu lostin yfir að þurfa að vera hálfnakin og berskjölduð við hliðina á draumaprinsinum mínum og ég get ekki hætt að hugsa ,,Jesús minn, ætli honum finnist ég ekki ógeðslega hvít“ og ,,Almáttugur minn, er ég feitust í heimi í þessum sundbol“. Eftir að búið er að lesa upp fáum við LOKSINS að fara ofan í fjandans laugina og þá fer mér nú að líða betur enda komin í felur í vatninu. Þegar tíminn er búinn bíð ég eftir að allir strákarnir séu farnir inn í klefa og þá dríf ég mig inn í klefa og undir heita sturtuna-Guðs lifandi fegin að það er vika í næsta sundtíma.

Gæti mögulega verið að þessi upplifun mín á unglingsárunum spili stóra rullu í því hvernig mér líður í sundlaugum?  Unglingar eru svo viðkvæmir og meðvitaðir um sig að svona stundir eins og sundtímar voru í ,,gamla daga“ geta haft áhrif lengi. Ég held allavega að í mínu tilfelli sé það svo.

Ef ég geri einhverntímann áramótaheit þá verður það að fara í sund oftar en 10 sinnum yfir árið án þess að fá ofsakvíða og ef Guð gefur að ég verði 70 ára þá ætla ég að fá mér bikiní og spígspora um sundlaugabakkann-Ég skal nefnilega yfirvinna þessa spéhræðslu einhvern daginn......en hvaða dag það verður, kemur í ljós.

p.s. af hverju þurfa sundbolir að vera svona hræðilega óklæðileg og ljót flík?

Ást og hamingja út í kosmósið

Lóa smiley

Grindavik.net

21.Júní'16

Grindavik.net er fréttavefur með áherslu á efni tengt Grindavik. Sjón er sögu ríkari.

ÚV á FM 104

23.Apríl'16

Góð tónlist flesta laugardaga og sunnudaga frá 16:00. Einnig eru pistlar frá Nice. ÚV á FM 104

Tveir eignarhlutir í TF-JSO eru til sölu

17.Mars'17

Góður afsláttur eða greiðsluskilmálar ef samið er strax. Nánari upplýsingar veitir Sigurjón I. Ingólfsson í síma 8405540.

Ert þú í fasteignahugleiðingum?

30.Janúar'16

Hefur þú skoðað nýjustu fasteignirnar frá Heimaey - Heimaey.net. Fasteignasala - Vestmannaeyjum. (smeltu hér).