Fjársvelt heilbrigðisstofnun

Í þessari uppsagnarhrinu var samtals fækkað um 13,1 stöðugildi sem er þá 4,8% fækkun á stöðugildum frá árslokum 2014.

100 millj­ón­a halli á fyrstu fjór­um mánuðum þessa árs

Að því er fram kem­ur í Sunn­lenska á fimmtudaginn var halli á rekstri stof­un­ar­inn­ar 100 millj­ón­ir króna á fyrstu fjór­um mánuðum þessa árs. Stofn­un­in hefur glímt við veru­leg­an fjár­hags­vanda sem að hluta er rek­inn til ár­anna fyr­ir sam­ein­ingu heil­brigðis­stofn­ana á Suður­landi í eina árið 2014. 

Höfuðstóll HSU var nei­kvæður um 350 millj­ón­ir króna við lok árs 2014. Meðal skulda stofnunarinnar er skuld til eins af lán­ar­drottnum uppá um 50 millj­ón­ir króna.

Viðbótarfjárveiting vegna sameiningar

Stofnuninn fékk 135 milljónir króna í viðbjótarfjárveitingu umfram fjárlög árið 2015 til að standa straum af tilfallandi verkefnum sem komu til vegna sameiningar og vegna uppsafnaðs rekstrarhalla. Þrátt fyrir þessa aukafjárveitingu var 50 milljón króna halli á rekstrinum árið 2015 og höfuðstóllinn því orðinn neikvæður um 400 milljónir króna, segir í frétt Sunnlenska.

Þá segir að samkvæmt fjárlögum þessa árs sé ráðgert að stofnunin hafi um 4,1 milljarð króna frá ríkinu til rekstursins. Erfiðlega gangi að ná utan um hallareksturinn en velferðarráðuneytið hefur leitað eftir skýringum hjá stjórnendum stofnunarinnar og gripið hefur verið til hagræðingaraðgerða í rekstrinum.

Hvað er til ráða?

Með sameiningunni 2014 færðist stór hluti yfirstjórnar spítalans á Selfoss, í nafni hagræðingar. Á móti töpuðust störf í öðrum sveitarfélögum. Ekki hefur fengist skipting á þeim stöðugildum sem nú eru lögð niður, þ.e.a.s hvernig þau skiptast á milli spítala stofnunarinnar.

Miðað við ofangreindar tölur má sjá að stofnunin er að tapa að meðaltali 25 milljónum á hverjum mánuði. Við sameiningu stofnana árið 2014 var talað um að það hlytist mikil hagræðing af því að hafa stofnanrnar allar undir sama hatti.  Ef reynt er að ráða í hvað þarf til - þá er ljóst að ekki verður ráðið við taprestur sem þennan einungis með niðurskurði. Þ.e.a.s ef hann á ekki að koma niður á klínískri starfsemi spítalans, líkt og forstjórinn heldur fram. Það verður einfaldlega að tryggja stofnuninni meira fjármagn og það hlýtur að verða keppikefli kjörinna fulltrúa okkar að tryggja að sú verði raunin.

Fjármagnið virðist ekki fylgja auknum umsvifum

Eðlilegt er að ráðuneytið geri kröfu á stjórnendur að þeir sýni aðhald í rekstri, en það eitt og sér dugir alls ekki í þessu tilfelli. Fyrir það fyrsta dugði stofnframlag ríkisins ekki til að gera upp fortíðardrauga spítalana sem sameinuðust. Fyrir vikið er enn verið að burðast með þá inní rekstrinum. Í annan stað ber að líta á vöxtinn á svæðinu. Á svæðinu er stærsta sumarbústaðabyggð landsins. Sjúkraflutningum fjölgar um tugi prósenta á milli ára. Yfir milljón ferðamenn fara um svæðið á ári hverju. En fjármagnið virðist alls ekki fylgja þessum auknu verkefnum. Ekkert kerfi virðist vera á því að með auknum umsvifum aukist fjármagnið. Þú setur ekki miða í hurðina á sjúkrahúsinu sem á stendur ,,Uppselt". Þarna getur verið um mannslíf að ræða.

Þegar ráðist var í þær uppsagnir sem nú ganga yfir á stofnuninni - hefði kannski verið gáfulegt að koma fram með eitthvert plan. Plan sem segir okkur hvað skuli gera til framtíðar. Að stofnuninni verði tryggt fjármagn í samræmi við vöxtinn í umdæminu.

Tökum dæmi. Það er til að mynda galið að með aukningu ferðamanna - þá aukast sjúkraflutningar á Suðurlandi - varlega áætlað um 30%  og með tilheyrandi kostnaði. Hvað geta stjórnendur gert, nú þegar búið er að skera niður inn að beini? Er þá kannski lausnin að segja upp ljósmóður í Vestmannaeyjum?

Ágæti ráðherra - þarf ekki fjármagn að fylgja auknum umsvifum í þessum geira?

Tengdar fréttir:

18 starfsmönnum sagt upp á HSU

,,Kemur mér algjörlega í opna skjöldu"

Vill frekari upplýsingar áður en hann tjáir sig

Fjárhagsleg staða HSU erfið

Kannast ekki við að hafa verið boðaður á upplýsingafund vegna hagræðingar