Georg Arnarson skrifar:

Landeyjahöfn eða sandeyjahöfn

1.Apríl'15 | 22:24

Landeyjahöfn er enn einu sinni komin í fréttirnar og enn og aftur fyrir það að höfnin sé full af sandi. Þegar maður skoðar myndina inni á eyjafréttum, sem fylgir fréttinni, þá sést vel að það er hægt að ganga þurrum fótum um hluta af höfninni og það rifjaðist upp fyrir mér, svona til gamans, sumar af yfirlýsingum Sigurðar Áss í gegnum árin. Fyrst, þessi óvenju mikli sandburður er vegna goss í Eyjafjallajökli.

Við vitum öll í dag að þetta var bara bull, sem og yfirlýsing hans um að Markarfljót væri að flytja óvenju mikinn sand niður og lagt í mikinn kostnað við að breyta farvegi þess til einskis. Síðan þá heyrum við hann reglulega lýsa því yfir að sandburðurinn hafi ekki aukist, en eins og ég hef orðað það svo oft áður, þá fer þetta algjörlega eftir veðri og vindum og bull Sigurðar um að náttúran myndi taka höfnina í sátt, er kannski besta dæmið um það, þegar menn eru að tala um hluti sem þeir hafa ekkert vit á, enda mun náttúran alltaf leitast við að útrýma þessu mannanna verki.

Eftir kynningarfundin í haust um nýsmíðina fjallaði ég um það að ég hefði fengið flass back þegar Sigurður sagði frá því, að reiknað væri með því að með nýsmíðinni yrðu frátafir í Landeyjahöfn aðeins 10 dagar. Nýlega var þessu breytt inni hjá Siglingamálastofnun í 10% og í ágætri kynningu á nýsmíðinni sem ég fékk frá Adda Steina, þá vorum við hins vegar algjörlega sammála um það, að það viti að sjálfsögðu enginn hversu miklar frátafirnar verða, en einn af skipstjórum Herjólfs sagði við mig fyrir nokkru síðan, að hann teldi að frátafirnar yrðu sambærilegar og á Herjólfi, og það sem verra væri, þessi nýja ferja gæti ekki siglt til Þorlákshafnar í tíðarfari eins og í vetur. Ég er nú ekki alveg sammála því, en eins og þekktur skipstjóri hér í bæ orðaði það við mig :"Þetta verður engin skemmtisigling." Og nokkuð ljóst að fækkun koja um 2/3 er eitthvað sem Eyjamönnum hugnast svo sannarlega ekki.

Ég skrifaði grein í júlí 2013, minnir mig, þar sem ég gagnrýndi það að ekki væri tekið á þessum pöntunum fyrir pláss á bíladekkinu, þar sem að mörg dæmi eru um, og fleiri hafa fjallað um, að þrátt fyrir að Herjólfur sé fullbókaður, þá sé jafnvel dæmi um það að meiri en 30 bílar af biðlistum hafi komist með, og ég velti því upp hvort ekki væri rétt að sekta þá sem ættu bókað en mættu ekki, en mér var hins vegar nýlega bent á það, að í flestum tilvikum væru þetta flutningsfyrirtækin sem ættu stundum bókað fyrir allt að 6-7 gáma, en mættu svo kannski bara með 2-3, skil vel að Eimskip eigi kannski erfitt með að beita sektum á sig sjálft, svo klárlega er þetta stærra vandamál heldur en ég hélt og tjónið fyrir ferðaþjónustuna í Vestmannaeyjum gríðarlegt. Nú liggur fyrir að hönnuninni á nýju ferjunni er lokið og ljóst, að með henni verður nánast stöðnun í samgöngumálum okkar, þó svo að það eigi að reyna að bæta eitthvað við ferðum yfir sumar mánuðina. Yfir vetrar mánuðina, hins vegar, gæti þetta klárlega orðið afturför ef allt fer á versta veg.

Ég sá ágæta grein fyrir um mánuði síðan frá bæjarstjóranum okkar, þar sem hann kvartaði sáran yfir því, að tekjur bæjarins hefðu minnkað verulega vegna fækkun starfa til sjós, sem einmitt ég hef varað við árum saman, sem eina af afleiðingum hins svokallaða frjálsa framsals. Þeim mun sárara er þá að ná því ekki að nýta okkur þessar spár um verulega aukningu ferðamanna á næstu árum með því að fá hingað stærri og gangmeiri ferju, en ekki er búið að fjármagna nýsmíðina ennþá, svo það er enn hægt að grípa inn í og þess vegna hægt að stækka ferjuna ef menn vilja.

Heyrði sagt frá því fyrir nokkru síðan að þingmaður Sjálfstæðisflokksins í suður kjördæmi, hefði látið hafa eftir sér að það væri gríðarlega mikilvægt að nýsmíðin væri komin til Eyja rétt fyrir kosningarnar 2017. Ótrúlega margir hafa líka sagt við mig að þetta sé líka það sem bæjarstjórinn okkar sé að hugsa, enda hugi hann á framboð einmitt það vor, ekki veit ég hvort að það sé rétt, en ég myndi hins vegar skilja það mjög vel enda bæjarstjórinn okkar í svipuðum málum og Landeyjahöfn, það fjarar svolítið hratt undan.

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Lumar þú á grein?

15.Febrúar'18

Endilega sendu okkur hana á eyjar@eyjar.net. Eyjar.net - fyrir alla. 

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.