Starfsendurhæfing Vestmannaeyja í uppnámi

22.Janúar'15 | 16:13

Starfsemi Starfsorku, starfsendurhæfingar Vestmannaeyja, verður lögð niður í óbreyttri mynd á næstu vikum og starfsfólki sagt upp. VIRK-starfsendurhæfingarsjóður hyggst ekki endurnýja rekstrarsamning við Starfsorku sem rennur út í apríl.

Starfsorka í Vestmannaeyjum hefur sinnt starfsendurhæfingu þar undanfarin sex ár í samstarfi við VIRK-starfsendurhæfingarsjóð, velferðarráðuneytið og Vinnumálastofnun. Þá hefur VIRK greitt hluta af rekstrarkostnaði Starfsorku samkvæmt föstum samningi, laun forstöðumanns, húsnæði og fleira.

Nú hefur VIRK tilkynnt að þessi fasti samningur verði ekki endurnýjaður. Haukur Jónsson, stjórnarformaður Starfsorku, segir það þýða að óbreyttu að rekstrargrundvöllur Starfsorku sé farinn. „Við verðum einfaldlega að endurskipuleggja reksturinn og sjá til hvað við gerum. Við þurfum að segja upp tveimur starfsmönnum og endurhugsa framhaldi, hvaða þjónustu við bjóðum upp á og hverjir geta notið hennar.“

Hrefna Óskarsdóttir, framkvæmdastjóri Starfsorku, segir að verkefnum hafi farið fækkandi síðustu mánuði. VIRK hafi markvisst vísað verkefnum í aðrar áttir og það hafi bitnað á Starforku. Og Haukur segir erfitt að sjá fyrir sér í augnablikinu hvort og þá hvernig hægt verði að halda rekstrinum áfram. „Þetta er það sem stjórnin þarf að leggjast yfir og finna hvað við getum gert,“ segir hann.

Ruv.is greindi frá.