Halldór Bjarnason skrifar:

Hvað vilja Vestmannaeyingar í ferjumálum?

23.Nóvember'14 | 17:01

Þá hefur bæjastjórinn, með stuðningi bæjarstjórnar, haft það í gegn að samgöngumál okkar hverfa aftur um tugi ára með því að keyra í gegn smíði á skipi sem verður jafnstórt og Herjólfur nr. 2 eða rúmir 60 metrar. Þrátt fyrir að hafa haft tækifæri til þess að leigja ferju sem ristir jafn mikið (lítið) og þetta skip sem er í hönnun. Nema þessi ferja tekur 1000 farþega og 170 bíla. Þarna hefði verið kjörið tækifæri að kanna hvort kenningar siglingastofnunar eigi við rök að styðjast. En eins og flestir vita þá hafa kenningarnar verið frekar vafasamar svo ekki sé meira sagt.

Þessi nýja ferja sem er í hönnun er sögð eiga að taka jafnmikið, eða meira, af bílum en núverandi Herjólfur. Þegar núverandi Herjólfur var smíðaður var reiknað með 70 bílum að stærð 4,2 m. en í dag flytur hann 60 – 62 bíla, bílar hafa stækkað síðan núverandi Herjólfur var smíðaður.

Þá skulum við skoða ferjuna sem á að bjóða okkur. Hún á að taka 60 bíla sem eru 4,2 m, sem sagt sömu viðmið og þegar Herjólfur var smíðaður. Það er því rangt að ferjan muni taka 60 bíla, hún kemur ekki til með að taka nema 52 – 54 bíla. Og áfram heldur leikritið; þeir segja við förum bara fleiri ferðir.  Af hverju fer núverandi Herjólfur ekki fleiri ferðir?

Bæjastjórnin lét fara fram kosningu um hvort reisa ætti hótel í gryfjunni fyrir ofan Hásteinsvöllinn. Er ekki komin tími til að kjósa um hvað Vestmannaeyingar vilja í ferjumálum.  Hvort við viljum láta smíða þessa litlu ferju eða leigja skipið sem stendur til boða og sannreyna hvort staðhæfingar siglingastofnunar um grunnristara skip eitt og sér leysi allan vanda Landeyjahafnar. Fólk er orðið þreytt á biðlistum og ef þessi ferja verður smíðuð verða biðlistar næstu 20 árin. Það er ekki það sem við viljum. En með því að leigja stærri ferju kæmumst við að raunverulegri flutningsþörf á farþegum og bílum til Eyja.

Er ekki kominn tími til að fá ferju sem tekur mið af spá Vegagerðarinnar um farþegafjölda til 2017, sem er 700.000 farþegar. Væri ekki ráð að leigja þessa ferju og sjá hvort hún virkar. Ef hún virkar ekki þá bara skilum við henni en ef hún virkar þá kaupum við hana eða smíðum sambærilegt skip. En ef við smíðum þessa ferju sem er í hönnun og hún virkar ekki sitjum við uppi með skipið. Ég er þess fullviss að flestir Vestmannaeyingar vilja leigja ferjuna sem er í boði, til reynslu, áður en ákvörðun verður tekin um framhaldið. Þetta er ekki einkamál bæjastjórans og bæjastjórnarinnar, þetta er mál allra Vestmannaeyinga. Vestmannaeyingar látið í ykkur heyra og horfum til framtíðar í samgöngumálum.

 

Halldór Bjarnason

Íbúi í Vestmannaeyjum

 

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Lumar þú á grein?

15.Febrúar'18

Endilega sendu okkur hana á eyjar@eyjar.net. Eyjar.net - fyrir alla. 

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.