Guðmundur Þ.B Ólafsson skrifar:

Kemur Samgöngustofu málið ekki við?

14.Nóvember'14 | 15:26
moggi_gtbo141114

Smelltu til að sjá stærra

Samgöngustofa og Vegagerðin hafa svarað opnu bréfi mínu, á vefsíðu Eyjafrétta, varðandi Landeyjarhöfn, fyrirhugaða smíði á minna skipi og breytingar á Herjólfi, það er því sem þau svara.

Kemur Samgöngustofu málið ekki við?

Svar Samgöngustofu er að beina eigi því sem fram kemur í bréfi mínu, til Vegagerðarinnar þar sem Samgöngustofa fari með eftirlit með því að skip fullnægi öryggiskröfum.

Satt best að segja hélt ég í mínum barnaskap að tillögur að breytingum á Herjólfi hafi miðað að því að auka öryggi skipsins og því Samgöngustofu að hafa skoðun á tillögum sérfræðinganna, um breytingar til að auka stjórnhæfni skipsins, við Landeyjarhöfn og ekki síst ef einhverjum af tillögum sérfræðinganna væru ekki framkvæmdar.

 

 

Vil ég ekki bæta samgöngur!!!

 

Sigurður Áss Grétarsson sem svarar bréfinu fyrir hönd Vegagerðarinnar byrjar svarið á eftirfarandi hátt: „Í bréfi Guðmundar Þ.B. Ólafssonar sem birtist á vefsíðu Eyjafrétta sl. fimmtudag er því haldið fram að forgangsatriði sé að bæta Landeyjahöfn en ekki að bæta samgöngur til Vestmannaeyja.“

Það er ekkert annað. Mér eru gefnar upp skoðanir að með því að vilja klára Landeyjarhöfn vilji ég ekki bæta samgöngur við Vestmannaeyjar. Orðrétt sagði ég í bréfi mínu: „Margoft hef ég viðrað þá skoðun mína að forgangsatriðið væri að klára hafnargerð í Landeyjarhöfn. Í kjölfarið eigi að smíða nýtt skip sem tæki mið af flutningsþörf og þjónustu við okkar samfélag en ekki sníða skip að höfn sem ekki er flullkláður.“ Þetta er sem sagt túlkað að ég vilji ekki bæta samgöngur við Vestmannaeyjar.

Ja! veikur er málstaðurinn.

 

Mestu samgöngubæturnar eru að klára höfnina

Í mínum huga eru mestu samgöngubætur við Vestmannaeyjar fólgnar í því að klára þessa blessuðu Landeyjarhöfn, höfn sem Sigurður Áss telur að geti ekki orðið betri, hugmyndir um stærri höfn andvana fæddar og staðsetningin sé sú besta sem völ er á við suðurströnd Íslands.

Ekki ætla ég að dæma neitt um staðsetninguna, en ég leyfi mér stórlega að efast um að hugmyndir um stærri höfn séu andvana fæddar.

Ég hef fylgst mjög vel með þessum hafnarframkvæmdum, allt frá kynningu Sigurðar Áss og félaga í upphafi þegar var verið að „markaðssetja höfnina“ og fram til dagsins í dag. Á kynningarfundum var því haldið fram að með staðsetningu Landeyjarhafnar, nákvæmlega á þeim stað sem höfnin er nú, væru möguleikarnir fyrir þessa höfn nánast ótakmarkaðir og ef menn myndu vilja að þetta yrði stórskipahöfn þá væri ekkert því til fyrirstöðu að lengja hafnargarða eins og mönnum listi. Því miður virðast sömu aðilar hafa snúið við blaðinu, telja breytingum á höfninni allt til foráttu og hugmyndir um slíkt andvana fæddar. Þeir hafa gefist upp.  

Hefur enginn annar rétt fyrir sér ef hann er annarrar skoðunar?

Ég er enginn sérfræðingur í hafnargerð og kemur það örugglega engum á óvart, en ég hlusta á hvað fólk hefur að segja og það þarf ekki að segja mér að allir aðrir, en Sigurður Áss Grétarsson og skoðanabræður hans, hafi vitlaust fyrir sér, sama hverjir þeir eru. Sem betur fer eru fjölmargir á annarri skoðun og því enn von um að höfnin verði kláruð.

Spurningu ósvarað

Ég spurði nokkurra spurninga í bréfi mínu varðandi tillögur sem sérfræðingar lögðu til að breytingum á Herjólfi svo hann ætti auðveldara með að sigla í Landeyjarhöfn, hverjar þær tillögur hefðu verið, hverjar framkvæmdar og hver hafi tekið ákvörðum um að sleppa breytingum hafi þeim verið sleppt. Fram kemur meðal annars í svari Sigurðar að tillögu um að setja skutskegg á Herjólf hafi verið látin bíða. Enn vantar svar við því hver tók þá ákvörðun og hver voru rökin? Þá væri einnig fróðlegt að upplýst verði: bíða með annað, þar til hvenær? Er enn ein frátöfin í vændum vegna verka sem ákveðið var að láta bíða?

 

Allt er hægt ef vilji er fyrir hendi

Þó það tengist þessu máli ekki má hér í lokin geta þess til gamans að ýmislegt er nú hægt sem er þó flóknara en hafnargerð og menn gefast ekki upp. Rétt í þessu var verið að lenda fyrirbæri á við þvottavél á halastjörnu, en það er nú annað mál.

Með vinsemd og kveðju.   

Guðmundur Þ. B. Ólafsson íbúi í Vestmannaeyjum.

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Viðhorfskönnun til samgangna og bæjarmála

2.Nóvember'18

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2018.

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is