Sigurrós á Þjóðhátíðinni í ár

1.Apríl'13 | 09:54

sigurrós

Þó svo að langt sé í að Þjóðhátíðin 2013 verður sett í Herjólfsdal þá er undirbúningurinn byrjaður enda margt sem þarf að klára í tíma fyrir svona stóra útihátíð.

Ákveðið hefur verið að gera ákveðnar breytingar á þjóðhátíðinni í ár og miðast þær aðallega að því gera hátíðina að meira tónleikahátíð en fjölskylduhátíð eins og Þjóðhátíðin hefur verið hingað til. Stærsta breytingin verður sú að Húkkaraballið verður fært inn í Herjólfsdal og hefst þjóðhátíðin með stórtónleikum þar á fimmtudagskvöldið samhliða Vitavígslu VKB bræðra.

Eyjar.net hefur heimildir fyrir því að hljómsveitin Sigurrós verði á húkkaraballinu og má búast við fjölmenni til eyja af þessum völdum og vonast þjóðhátíðarnefnd til þess að með þessu fjölgi erlendum gestum til muna í Dalnum.

Þegar Eyjar.net hafði samband við Eyjólf Guðjónsson sem sæti á í þjóðhátíðarnefnd vildi hann lítið segja um það hvort Sigurrós yrði á húkkaraballinu en Eyjólfi fannst þó líklegt að einhver Sigurrós yrði í Dalnum.

Eyjar.net hefur jafnframt heimildir fyrir því að byrjað verður að selja miða á húkkaraballið með Sigurrós klukkan 12:00 í dag á http://www.dalurinn.is. Verðið inn á Húkkaraballið verður 12.900.