Lagt til að Markarfljótið verði flutt fjær Landeyjahöfn

27.Febrúar'13 | 07:45
Fullreynt þykir að gera núverandi Vestmannaeyjaferju út frá Landeyjahöfn. Bjóða á út smíði nýrrar ferju á næstunni. Danska straumfræðistofnunin leggur til að ós Markarfljóts verði færður 2,5 kílómetra til austurs.
 
Til þess að komast hjá miklum jarðefnaburði úr Markarfljóti í Landeyjahöfn þarf að færa farveg árinnar 2,5 kílómetra til austurs. Þetta er mat Dönsku straumfræðistofnunarinnar.
 
Undanfarna mánuði hafa sérfræðingar Dönsku straumfræðistofnunarinnar (DHI) unnið að rannsóknum í Landeyjahöfn. Niðurstöður þeirra voru kynntar í síðustu viku á fundi samráðshóps um samgöngur, að því er fram kom á bæjarráðsfundi í Eyjum í gær.
 
Danirnir telja að lenging hafnargarða skili ekki bættri hafnaraðstöðu heldur auki þvert á móti straum og ölduhæð og geri innsiglingu erfiðari en nú er. Hins vegar séu líkur á að bæta megi höfnina, meðal annars með neðansjávarrifum og föstum dælubúnaði.
 
„Danska straumfræðistofnunin leggur til að farið verði í svokallaðar „reservoir"-lausnir sem eru róttækari en þær dýpkunaraðferðir sem hingað til hafa verið notaðar," segir í fundargerð bæjarráðs. Fulltrúi Siglingastofnunar telji hins vegar mikla óvissu um magn sandflutninga sem fylgi þeirri lausn. „Niðurstöður DHI gera ráð fyrir að færa þurfi Markarfljót til austurs um 2,5 kílómetra sem fyrst til að forðast þann mikla efnisburð sem því fylgir. Farvegur þess hefur þegar verið færður um 650 metra með góðum árangri."
 
Tveir fulltrúar Vestmannaeyja í þarfagreiningarhópi um nýja Vestmannaeyjaferju fóru nýlega í siglingahermi í Danmörku þar sem þeir prófuðu að sigla fjórum tegundum skipa inn í Landeyjahöfn. „Núverandi Herjólfur kom langverst út úr öllum mælingum," segir um þetta í fundargerð bæjarráðs. Fulltrúarnir telji fullreynt með núverandi Herjólf.
 
Þá segir að vonast sé til að hægt verði að bjóða hönnun nýs Herjólfs út um páskana og að nýtt skip verði komið til þjónustu eigi síðar en vorið 2015. Skipið sem henti best í verkefnið sé litlu minna en Herjólfur en taki fleiri bíla og sama fjölda farþega. „Með styttri lestunar- og losunartíma mun verða hægt að sigla fleiri ferðir á núverandi siglingatíma og þannig auka verulega framboð sæta."

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.