Mér finnst Kári vera leikmaður sem gæti komið á óvart fyrir okkar lið á EM

segir Atli Hilmarsson fyrrverlandi landsliðsmaður um Kára Kristján

11.Janúar'12 | 11:25

Eftir 4 daga hefst í Serbíu EM í handbolta og eru góðar líkur á því að Guðmundur Guðmundsson landsliðsþjálfari velji Kára Kristján í lokahóp Íslands fyrir EM enda hefur Kári spilað frábærlega í vetur með Wetzlar.

Morgunblaðið fjallar um EM í dag og þá sérstaklega um fjóra leikmenn Íslands og er Atli Hilmarsson fyrrverandi landsliðsmaður spurður úti í kosti og galla leikmanna. Atli hafði þetta að segja um Kára Kristján:

Kári Kristján Kristjánsson

„Það er kannski sama vandamálið hjá honum og Róberti. Gallinn hans er varnarleikurinn og skrýtið að það sé ekki hægt að nota svona skrokka í vörninni. Það er bara ansi mikið klúður,“ segir Atli um Eyjamanninn Kára Kristján Kristjánsson, sem leikur með Wetzlar í Þýskalandi.

„Kári hefur skorað mikið af mörkum fyrir Wetzlar í vetur og mér finnst hann hafa bætt sig heilmikið á flestum sviðum. Þú þarft að vera svolítið góður til að skora 6-7 mörk í þýsku Bundesligunni. Mér finnst Kári vera leikmaður sem gæti komið á óvart fyrir okkar lið á EM, því það eru ekki margir sem þekkja til hans. Hann hefur verið í litlu hluverki með landsliðinu undanfarin ár en hefur færst nær liðinu og það er sama með hann og Vigni. Kári fær að spila mikið með liði sínu í Þýskalandi og með því bæta menn sig.“