ÍBV stúlkur byrja með látum

15.Maí'11 | 07:56
Nýliðar ÍBV byrjuðu Íslandsmótið með látum þegar þær gerðu sér lítið fyrir og lögðu Þór/KA 0-5 á Þórsvelli í kuldanum á Akureyri. Vesna Smiljkovic og Danka Podavac voru erfiðar sínum gömlu liðsfélögum en Danka skoraði tvö marka ÍBV og Vesna setti eitt. Að auki komust þær Berglind Björg Þorvaldsdóttir og Þórhildur Ólafsdóttir á blað.
Gestirnir frá Vestmannaeyjum fengu draumabyrjun á 3. mínútu leiksins. Kristín Erna Sigurlásdóttir komst þá upp að endamörkum og gaf fyrir mark heimamanna. Knötturinn barst til Þórhildar Ólafsdóttur á fjærstöng, sem gerði afar vel og setti knöttinn snyrtilega í fjærhornið, 0-1. Eftir mark gestanna, náðu heimamenn örlítið betri tökum á leiknum, héldu knettinum örlítið betur og sköpuðu sér nokkur hálffæri.
 
Þrátt fyrir að vera sterkari aðilinn náðu heimamenn ekki að jafna leikinn og í staðinn náðu gestirnir að bæta við sínu öðru marki og var það Vesna Smiljkovic að verki. ÍBV komst þá í sókn, varnarmenn heimamanna áttu í erfiðleikum með að koma knettinum frá, sem endaði á því að Berglind Björg náði að leggja boltann út til Vesnu, sem lét bara vaða á markið. Fast skot sem Berglind í marki heimamanna réð einfaldlega ekki við og staðan því 0-2 eftir 21. mínútna leik.
 
Heimamenn héldu áfram að vera meira með boltann og skall hurð nær hælum tvisvar við mark gestanna þegar þær þurftu að bjarga á línu. Sama hvað heimamenn reyndu, fátt virtist ganga upp. Gestirnir spiluðu afar skynsamlega, sátu til baka og beittu skyndisóknum.
 
Þriðja mark gestanna kom upp úr einni af skyndisóknunum gestanna. Vesna komst þá inn fyrir vörn Þór/KA, en Vesna virtist vera rangstæð en dómari leiksins dæmdi ekkert og hélt því Vesna leið sinni áfram.
 
Vesna gaf út í teig þar sem Danka Podovac var mætt og setti knöttinn upp í vinkilinn, óverjandi, 0-3. Heimamenn náðu ekki að minnka muninn fyrir hlé og leiddu gestirnir 0-3 þegar liðin gengu til búningsklefa og áhorfendur á Þórsvellinum ætluðu vart að trúa sínum eigin augum.
 
Gestirnir byrjuðu síðari hálfleikinn eins og þær byrjuðu þann fyrri. Strax á 47. mínútu náðu gestirnir að bæta við sínu fjórða marki. ÍBV komst þá í einni af sínum skyndisóknum sem endaði á að Berglind Björg sem virtist vera fyrir innan vörn heimamanna, fékk frábæra sendingu inn í teig, þar sem hún tók knöttinn niður á brjóstið og lagði knöttinn snyrtilega í netið, óverjandi fyrir Berglindi og staðan skyndilega 0-4.
 
Áfram héldu heimamenn að sækja og sköpuðu sér færi, en knötturinn vildi einfaldlega ekki inn og fátt datt með heimamönnum. Hins vegar náðu gestirnir að bæta við sínu fimmta marki og var það Danka Podovac að verki úr vítaspyrnu. ÍBV komst þá í hraða sókn sem endaði á að Vesna Smiljkovic var sloppin í gegn, en Berglind Magnúsdóttir braut á Vesnu og Bjarni Hrannar dómari leiksins gat ekki annað en dæmt víti.
 
Á vítapunktinn steig Danka Podovac sem skoraði örugglega úr vítinu. Norðanstúlkur héldu áfram að reyna að klóra í bakkann en sem fyrr gekk ekkert upp. Meðal annars átti Mateja Zver skalla sem endaði í stönginni, sem endurspeglaði leik heimamanna, ekkert gekk upp. Vestmanneyingar gerðu þó vel, biðu átekta og freistuðu þess að sækja hratt á heimamenn. Hvorugu liðinu tókst að bæta við mörkum og því fögnuðu gestirnir frá Vestmannaeyjum öruggum og sanngjörnum 0-5 sigri.
 
Hrósa verður liði gestanna fyrir að nýta styrkleika sína í dag. ÍBV biðu til baka og nýttu skyndisóknir sínar afar vel og nýttu hraða Vesnu Smiljkovic til hins ýtrasta. Því verður afar spennandi að fylgjast með ÍBV í sumar, þá sérstaklega gegn hinu sterkari liðunum eins og Stjörnunni og Val. Hins vegar voru heimamenn langt frá sínu besta í dag.
 
Framlína liðsins hefur oft átt betri dag, en þær Rakel Hönnu, Manya Makoski og Mateja Zver eiga greinilega enn eftir að slípa sig saman þar sem hlaupin hjá þeim stöllum í dag voru ekki nægilega vel tímasett. Varnalína heimamanna hefur einnig átt betri daga, þar sem öll mörk gestanna hefði hæglega verið hægt að koma í veg fyrir.
 
Hins vegar er það ótrúlegt að heimamenn skyldu ekki ná að seta eitt mark í dag. Gestirnir björguðu minnsta kosti þrisvar á marklínu, Manya Makoski fékk frábært færi sem Birna Berg varði meistaralega og síðan áttu þær skot í stöng.
 
Þegar á botnin er hvolft, þá var sigur gestanna sanngjarn. Þær nýttu sínar sóknir fullkomlega og vörðust að auki afar fimlega.
 
Frétt frá Fótbolta.net. Sjá alla fréttina: http://fotbolti.net/fullStory.php?action=viewStory&id=108324#ixzz1MPFk4oer
 

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Lumar þú á grein?

15.Febrúar'18

Endilega sendu okkur hana á eyjar@eyjar.net. Eyjar.net - fyrir alla. 

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is