Gleðilega páskahátíð 2011 og vorhátíð á annan í páskum

21.Apríl'11 | 19:09

Landakirkja

Páskar eru seint í ár og sameinast vorhátíð Landakirkju henni í ár á annan í páskum. Lesið hér um páskagleðina og hvernig mestu hátíð kristinna manna verður fagnað í Landakirkju að þessu sinni. Athygli er vakin á vorhátíðinni 2. dag páska og breyttum messutíma þá og föstudaginn langa.
Nú renna upp dymbildagar í kyrruviku en þeir eru ómissandi aðdragandi páskahátíðar. Páskar ganga í garð á sunnudag, páskadag, en það er upprisuhátíð Jesú. Á páskum minnumst við upprisu hans frá dauðum og það er þess vegna sem við segjum gleðilega páska. Áður fyrr var stunduð sérstök kirkjuleg athöfn sem kallaðist páskahlátur. Hann átti sér stað á páskadagsmorgni í kirkjunni en í dag einkennist sú hátíðarguðsþjónusta af innilegum fögnuði. Gleðin starfar af því að Jesús reyndist vera Kristur þegar hann vann sigur á dauðanum. Á sigri hans byggist allt kristnihald í heiminum. Það er því viðeigandi að tala um páskagleði. Ef við mætum í allar guðsþjónustur og messur á dymbildögum og páskum getum við öðlast merkilega reynslu af hrynjanda hátíðarinnar.
 
 
Föstudaginn langa er guðsþjónusta kl. 11 sem hefur sérstakt form. Lesið er úr píslasögu Krists og völdum passíusálmum, en sumir þeirra sungnir á milli. Þá eru lesin orð Krists á krossinum. Í lokin er krossinn tignaður með því að reisa auðan trékross á altarið sem enn er óskrýtt og sveipað svörtu frá því kvöldið áður. Kór Landakirkju syngur kórverk og mikið er lagt í kirkjulega tónlist í þessari athöfn.
 

Árla dags á páskadag hefst hátíðarguðsþjónusta kl. 8. sungnir eru hátíðarsöngvar sr. Bjarna Þorsteinssonar og gleðilegir páskasálmar sem allir vitna um upprisu Jesú Krists frá dauðum. Eftir hátíðarguðsþjónustuna býður sóknin til morgunverðar í Safnaðarheimilinu, rjúkandi kaffi, rúnnstykki og vínarbrauð. Kl. 10.30 verður svo hátíðarguðsþjónusta á Hraunbúðum.
 

Annan dag páska er haldin vorhátíð barna- og æskulýðsstarfs í kirkjunni og hefst hún kl. 12 á hádegi. Fyrst er létt fjölskylduguðsþjónusta með barna- og æskulýðssálmum. Búast má við því að hún leysist upp í páskaeggjaleit sem borist getur um alla kirkju og jafnvel víðar. Eftir stundina verður grillað og farið í leiki. Hér geta allir safnast saman sem verið hafa í mömmumorgnum, barnaguðsþjónustunni, STÁ, NTT, ETT, fermingarfræðslunni, Æskulýðsfélaginu, Kirkjustarfi fatlaðra og Litlum lærisveinum, en auðvitað eru allir velkomnir og um að gera að fá sem flesta.

Prestar, Kór, organisti, sóknarnefnd og annað starfsfólk vonast til að fólk komi og taki þátt í þessu helgihaldi á mestu hátíð kristinna manna. Eru Eyjamenn líka hvattir til að láta gesti Eyjanna vita hvað er í boði í kirkjunni því vitað er að páskahelgin er mikil ferðahelgi hjá landsmönnum öllum.

www.landakirkja.is
 

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Lumar þú á grein?

15.Febrúar'18

Endilega sendu okkur hana á eyjar@eyjar.net. Eyjar.net - fyrir alla. 

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.