Grein eftir Ottó Björgvin Óskarsson í Tímariti Lögfræðinga um úthlutun byggðarkvóta

18.Desember'10 | 09:38
Nýverið birtist grein eftir eyjamanninn Ottó Björgvin Óskarsson í Tímariti Lögfræðinga um úthlutun byggðarkvóta. Ottó Björgvin Óskarsson er fæddur 29. mars 1979 í Vestmannaeyjum. Hann lauk embættisprófi í lögum við lagadeild Háskóla Íslands 2006 og námskeiði til öflunar réttinda til að vera héraðsdómslögmaður 2010 (hdl.). Hann hefur starfað sem lögfræðingur hjá umboðsmanni Alþingis frá 24. janúar 2006. Eyjar.net birtir hér að neðan samantekt úr greininni:
Í grein sinni um úthlutun byggðakvóta varpar Ottó Björgvin ljósi á þær lagareglur sem gilda um úthlutun byggðakvóta og þá lagaframkvæmd sem gildir um úthlutun hans og sjá má meðal annars í álitum umboðsmanns Alþingis. Í greininni er leitast við að svara hvað er byggðakvóti. Enn fremur er sett fram stutt lýsing á því hverjir hafa hagsmuna að gæta af úthlutun byggðakvóta en það eru byggðarlög, útgerð og fiskvinnsla.

Í kafla 2.4 er vikið að því markmiði sem liggur að baki byggðakvótanum en það er að styðja viðkomandi byggðarlög sem og styrkja og efla útgerð og fiskvinnslu innan þeirra. Með hliðsjón af þessu markmiði setur Ottó Björgvin fram þær hugleiðingar hvort það sérsjónarmið gildi um byggðakvóta að hann gangi ekki kaupum og sölum eins og aðrar aflaheimildir. Niðurstaðan er sú að framsal byggðakvóta sé heimilt að vissum takmörkunum uppfylltum sem mælt er fyrir um í lögum nr. 116/2006, um stjórn fiskveiða.
 
Í kafla 2.5 í greininni gerir Ottó Björgvin grein fyrir því hvernig byggðakvótafyrirkomulagið er hluti af því aflamarkskerfi sem lög nr. 116/2006 kveða á um og hvaða áhrif byggðakvótinn hefur á leyfilegan heildarafla sem ráðherra ákveður á hverju ári að heimilt sé að veiða. Þau áhrif sem hér um ræðir hafa valdið óánægju hjá tilteknum hagsmunaðilum sem sérstaklega er vikið að í umræddum kafla.

Í köflum 3.1 og 3.2 í greininni lýsir Ottó Björgvin með almennum hætti því lagaumhverfi sem gildir um úthlutun byggðakvóta og hvaða breytingar hafa verið gerðar á því á síðustu árum. Hann dregur þá ályktun af þeim lögskýringargögnum, sem vikið er að í kafla 3.2, að álit umboðsmanns Alþingis hafi haft verulega þýðingu fyrir það lagaumhverfi sem gildir núna um úthlutun byggðakvóta og nefnir m.a. í því sambandi lög nr. 21/2007, um breytingu á lögum nr. 116/2006, um stjórn fiskveiða. Með 1. gr. fyrrnefndu laganna voru gerðar talsverðar breytingar á 10. gr. síðarnefndu laganna þar sem tekið var tillit til athugasemda umboðsmanns í álitum hans frá 30. júní 2006 í málum nr. 4477/2005, 4557/2005, 4583/2005 og 4588/2005.
 
Í kafla 3.3 í greininni lýsir Ottó Björgvin því hvernig ráðstöfun og úthlutun byggðakvóta fer fram, allt frá því að sjávarútvegs- og landbúnaðarráðherra tekur í upphafi ákvörðun um að ráðstafa byggðakvóta, hann setur með reglugerð almennar reglur um úthlutun byggðakvótans, hann staðfestir tillögur sveitarstjórna um sérstök skilyrði fyrir úthlutuninni og þar til hann úrskurðar í málum á grundvelli stjórnsýslukæra. Þetta er bæði flókið og tímafrekt ferli í íslenskri stjórnsýslu. Til skýringar er bæði vikið að einstökum álitum umboðsmanns Alþingis um efnið og tilteknum ákvæðum í stjórnvaldsfyrirmælum. Í e-lið í kafla 3.3 er sérstaklega vikið að hinum tveggja mánaða lögbundna afgreiðslufresti sem ráðherra hefur til að úrskurða í kærumálum. Með tilliti til þess umsagnarferlis sem fer í gang í kjölfar kæru og þeirrar stjórnsýsluframkvæmdar sem hefur verið hjá sjávarútvegs- og landbúnaðarráðuneytinu í kærumálum varðandi úthlutun byggðakvóta fiskveiðiárið 2006-2007 veltir Ottó Björgvin því fyrir sér hvort hinn umræddi afgreiðslufrestur sé of stuttur. Sjónarmið með og á móti því að lengja frestinn eru færð fram.
 
Í kafla 4 í greininni greinir Ottó Björgvin frá athugun á því á hvaða reglur stjórnsýsluréttar hafi reynt mest í álitum umboðsmanns er lúta að úthlutun byggðakvóta eða að hverju hafa athugasemdir umboðsmanns í álitunum beinst mest. Niðurstaða athugunarinnar er sú að það hafi reynt mest á rannsóknarregluna í álitunum. Greinarhöfundur telur að niðurstaðan komi ef til vill ekki á óvart þegar litið er til samantektar umboðsmanns sem fór fram 2006 og laut að athugasemdum hans í álitum sem hann gaf út á tímabilinu 2002-2006. Samantektin leiðir í ljós að annmarkar á rannsókn mála hafi verið fyrirferðamestir. Hins vegar telur Ottó Björgvin að það að umboðsmaður hafi gert athugasemdir við það í átta álitum af ellefu er lúta að úthlutun byggðakvóta að rannsókn mála væri áfátt sé of mikið.
 
Greinina má lesa í heild sinni í Tímariti Lögfræðinga en hægt er að kaupa tímaritið hér
 
 

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Viðhorfskönnun til samgangna og bæjarmála

2.Nóvember'18

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2018.

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.