Staða Vestmannaeyjabæjar er sterk

Gert er ráð fyrir að samstæða sýni rekstrarhagnað að upphæð 138 milljóna og veltufé samstæðu verði 479 milljónir

Fréttatilkynning frá Vestmannaeyjabæ

10.Desember'10 | 13:13
Fjárhagsáætlun fyrir árið 2011 var lögð fram til fyrri umræðu í bæjarstjórn 9. desember í samræmi við reglur um bókhald sveitarfélaga og hefðir sem myndast hafa hjá Vestmannaeyjabæ. Síðari umræða fer fram 16. desember.
 
 
Helstu niðurstöðutölur í fjárhagsáætlun fyrir árið 2011 eru þær að gert er ráð fyrir að sveitarsjóður skili hagnaði að upphæð 188 milljóna í stað 132 milljóna í áætlun 2010. Þá er reiknað með því að veltufé sveitarsjóðs frá rekstri verði jákvætt um rúmar 345 milljónir en það var áætlað tæpar 345 milljónir árið 2010 og 487 milljónir árið 2009. Gert er ráð fyrir að samstæðan sýni rekstrarhagnað að upphæð 138 milljónir og veltufé samstæðu verði 479 milljónir en það var áætlað 441 milljón fyrir 2010 og 544 milljónir fyrir árið 2009.
 
Heildarskatttekjur eru áætlaðar 1.737 milljónir. Þar er um 13% lækkun frá rauntekjum ársins í ár að ræða og ræður þar mestu að gert er ráð fyrir 15% skerðingu á úrsvari. Skýringin sem þar liggur að baki er margþætt. Það sem mestu ræður er annarsvegar trú á að krónan styrkist sem veldur lækkun á afurðarverði og þar með tekjum Vestmannaeyjabæjar og þær ömurlegu væringar sem eru í kringum sjávarútveginn og dregur úr honum mátt og þrótt á verstu tímum. Á tímum sem sjávarútvegurinn á gríðarleg sóknarfæri velja stjórnvöld að setja umhverfið í uppnám með stórheyrilegum skaða fyrir landið allt og þá sérstaklega okkur á landsbyggðinni. Heggur þar sá er hlífa skyldi.
 
Áfram er gert ráð fyrir verulega skertum tekjum í framlögum jöfnunarsjóðs eða um tæpar 90 milljónir. Framlög ríkisins í gegnum jöfnunarsjóð hafa þá verið skert um 276 milljónir eða um rúmlega 50% á þremur árum. Ljóst er að slíkri skerðingu á tekjum verður ekki mætt nema með vönduðum aðhaldsaðgerðum. Á móti kemur að Eyjamenn geta sannarlega borið höfuðið hátt því að þeir bera ekki bara uppi eigið samfélag með eigin tekjum heldur liggja þeir fastast á þeim árum sem nú róa landinu út úr þeim ógöngum sem óheillafólk í hinu íslenska viðskiptalífi kom landinu í.
Þá eru heildartekjur samstæðu áætlaðar 3.121 milljón þegar millifærslur hafa verið dregnar frá en voru áætlaðar 2.996 milljónir fyrir árið í ár (4% hækkun).
 
Heildargjöld sveitarsjóðs eru áætluð 3.189 milljónir í stað 3.359 milljóna í ár. Hér er 5% lækkun að ræða.
 
Allt frá árinu 2007 hefur Vestmannaeyjabær nýtt allt laust fé í uppgreiðslu lána og sjást þess glögg merki í fjárhagsáætlun fyrir árið 2011. Greiddar afborganir samstæðu voru í áætlun fyri árið 2008 734 milljónir en í áætlun fyrir 2011 eru gert ráð fyrir 121 milljón eða um 613 milljónum minna.
Vestmannaeyjabær leigir stóran hluta af fasteignum sínum af Fasteign hf. Gert er ráð fyrir umtalsverðum hækkunum á leigukostnaði milli 2010 og 2011 eða úr 142 milljónum í 186 milljónir enda ekki gert ráð fyrir að samþykkt stjórnar Fasteignar hf. um 28% afslátt verði framlengd eftir að sú samþykkt rennur út nú í árslok.
 
Rekstur hafnarinnar er með hefðbundnu sniði. Þó hefur hagur hafnarsjóðs vænkast með auknum tekjum sjávarútvegsfyrirtækja. Enn og aftur kemur í ljós að þegar vel fiskast njóta allir íbúar góðs af því. Ekki bara sjómenn og þaðan af síður eingöngu hinir alræmdu útgerðarmenn. Hafnarsjóður er áætlaður með rekstarhagnað að upphæð 214.000 í stað áætlaðs halla upp á 33.295.000.
 
Ekki verður horft fram hjá því að staða Vestmannaeyjabæjar er sterkari en flestra samanburðar sveitarfélaga. Víðast hvar er nú staðið í erfiðum niðurskurði annað árið í röð um 10 til 15% með uppsögnum og þjónustuskerðingu. Á meðan getur Vestmannaeyjabær aukið þjónustu og létt álögum af fjölskyldum Mestu skiptir þar ákvörðun um að halda aftur af verklegum framkvæmdum á þenslutímum og greiða niður skuldir.
 
Vestmannaeyjabær hefur nú ekki tekið lán í næstum 4 ár og vaxtarberandi skuldir hans við lánastofnanir eru nú einungis rétt rúmur milljarður og ætti sveitarfélagið að verða nánast skuldlaust árið 2018. Lausafjárstaða Vestmannaeyjabæjar er er einnig sterk. Peningaleg eign er um 3,7 milljarðar. Skuldir sveitarfélaga í landinu voru hinsvegar 228 milljarðar í lok árs 2009. Hreinar vaxtaberandi skuldir sveitarfélaga nema þar af um 130 milljörðum króna en þá eru lífeyrisskuldbindingar ekki taldar með, né skuldir utan efnahags. Í byrjun síðasta árs námu skuldbindingarnar 43 milljörðum króna á verðlagi í nóvember. Skuldir utan efnahags voru með sama hætti um 45 milljarðar. Alls eru þetta 228 milljarðar.
 
Staða Vestmannaeyjabæjar er því sterk bæði í samanburði við önnur sveitarfélög og þegar horft er til framtíðar rekstrarhæfi. Verkefnið er helst að sýna áfram skynsemi og ráðdeild í rekstri.
 
 

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.

Lumar þú á grein?

15.Febrúar'18

Endilega sendu okkur hana á eyjar@eyjar.net. Eyjar.net - fyrir alla. 

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.