Telja að Markarfljót hafi snúið Herjólfi

20.Nóvember'10 | 10:20

Herjólfur

Skipstjóri og rekstrar­stjóri Herjólfs telja straum frá Markarfljóti líklega orsök þess að ferjan snerist á hlið fyrir utan hafnargarðinn í Landeyjahöfn á miðvikudag.
Ívar Gunnlaugsson skipstjóri segir Herjólf fyrst hafa snúist á bakborða og síðan á stjórnborða rétt utan við hafnargarðinn þegar hann var að stýra ferjunni inn í Landeyjahöfn. „Ég stoppaði bara skipið og lét bógskrúfuna snúa því á rétta stefnu og hélt áfram inn," lýsir Ívar, sem kveður alls enga hættu hafa verið á ferð. „Ég held að það hafi ekki nokkur maður orðið var við þetta."
 
Veður var gott og aðeins 1,6 metra ölduhæð þegar atvikið varð. Dýpi undir skipinu var um þrír metrar. Ívar segist áður hafa siglt þarna um í þriggja metra ölduhæð án nokkurra vandkvæða. Hann segist ekki vita hvað olli því að skipið snerist en er viss um að þar hafi verið einhverjir utanaðkomandi kraftar verið að verki. Helst detti honum í hug að straumur frá Markarfljóti hafi þyngst.
 
„Fljótið er búið að grafa sig meðfram fjörunni og fer fyrir framan höfnina og það er eitthvað sem skrúfar sig upp fyrir framan hafnar­kantinn," segir Ívar.
 
Guðmundur Pedersen, rekstrar­stjóri hjá Eimskipi, tekur undir með skipstjóranum. Markarfljót sé farið að renna alveg út með hafnar­garðinum og mikil breyting hafi orðið á botninum.
 
„Þetta myndar allt saman einhverjar straumiður og hnúta. Það virðist vera lykilatriði að þessi ós verði færður. Það gengur ekki að áin komi út við hafnarkjaftinn," segir Guðmundur og upplýsir að einmitt eigi að funda með landeigendum á mánudaginn um þá áætlun að flytja ós árinnar til austurs.
 
Atvikið var rætt á fundi hjá Siglingastofnun á fimmtudag. Sigurður Áss Grétarsson, forstöðumaður hafnarsviðs, segir ekki tímabært fyrir stofnunina að gefa út álit um málið. Þess má geta að Eimskip, sem annast rekstur Herjólfs fyrir Vegagerðina, hafnar því að afhenda myndir sem til eru af atvikinu úr öryggismyndavélum í Landeyjahöfn. „Við látum aldrei neitt úr okkar öryggiskerfum nema fyrir liggi beiðni frá lögreglu," segir Eyþór Ólafsson, yfirmaður öryggisdeildar.
 
Ívar skipstjóri ítrekar að fyrst og síðast líti menn til öryggis skipsins og farþeganna og taki því enga áhættu. Hann minnir hins vegar á Herjólfur sé sennilega lengri, breiðari, djúpristari og háreistari en Landeyjahöfn sé hönnuð fyrir. „Þetta er eins og að leggja í allt of lítið bílastæði. En það bjargar Herjólfi að hann er svo gott og öflugt skip."

Viðhorfskönnun til samgangna og bæjarmála

2.Nóvember'18

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2018.

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.