Rekstrarhagnaður VSV nær 900 milljónir króna árið 2009

18% arður greiddur út í evrum

1.Júlí'10 | 16:23

VSV vinnslustöðin

• Starfsmönnum fjölgaði um 50 á einu ári
• Fyrningarleiðin mesta ógnin
 
 
Rekstrartekjur samstæðu Vinnslustöðvarinnar í Vestmannaeyjum (VSV) námu 56,7 milljónum evra á árinu 2009 og framlegð samstæðunnar nam 11,2 milljónum evra. Þetta kom fram á aðalfundi félagsins 23. júní sl.
 
Þar sem VSV birtir nú í fyrsta sinn samstæðuuppgjör má til samanburðar geta þess að á árinu 2009 voru rekstrartekjur móðurfélags VSV 49,3 milljónir evra en 63 milljónir evra árið 2008.
Rekstrartekjurnar drógust því saman um 22% og framlegð móðurfélags dróst saman um 26% frá fyrra ári. Helsta skýring tekju- og framlegðarsamdráttar er loðnuveiðibann og lægra afurðaverð á dýrari fisktegundum
 
Rekstur VSV skilaði 5,6 milljóna evra hagnaði, jafnvirði um 900 milljóna króna, á árinu 2009.
 
VSV nýtti sér lagaheimild til að færa reikninga sína í evrum frá og með árinu 2008. Aðalfundur samþykkti nú að skrá hlutafé félagsins í evrum og að í kjölfarið yrði greiddur út 18% arður í evrum. Eigið fé VSV var tæplega 30 milljónir evra í lok árs 2009 og eiginfjárhlutfall tæp 33%. Ef sömu reikningar félagsins hefðu verið færðir í íslenskum krónum væri eigið fé þess neikvætt um 872 milljónir króna og eiginfjárhlutfallið neikvætt um 8,7%!
 
Nær allar tekjur VSV eru í erlendum myntum og skuldir sömuleiðis. Staða og afkoma VSV er því skólabókardæmi sem álitsgjafar og skoðanahönnuðir í opinberri umræðu um skuldastöðu sjávarútvegsins geta velt vöngum yfir og vonandi dregið nokkurn lærdóm af, kæri þeir sig um. Vinnslustöðin skuldar þang 61 milljón evra og hefur ekki skuldað minna í evrum frá árinu 2003. Tekjurnar voru 20 milljónum evra meiri 2009 en 2003. Skuldirnar tvöfölduðust hins vegar í íslenskum krónum við hrunið og á slíka stærð er horft í umræðunni en hún segir augljóslega hverfandi sögu um raunverulega stöðu VSV.
 
VSV greiddi um tvo milljarða króna í laun á árinu 2009. Starfsmennirnir eru nú um 280 talsins og þeim fjölgaði um 50 á einu ári. Þetta sýnir í hnotskurn hvaða þýðingu öflugt sjávarútvegsfyrirtæki hefur fyrir byggðina í Eyjum og íslenskt samfélag yfirleitt.
 
 
Stjórnendur VSV fjölluðu nýlega um ógnir og tækifæri í rekstrinum í aðdraganda nýs stjórnskipulags fyrirtækisins, sem kynnt verður fljótlega. Niðurstaða þeirra er sú að VSV stafi meiri hætta af fyrningarleið stjórnvalda en af afurðaverði, markaðsaðstæðum, náttúrunni eða fjármálakerfi heimsins. Í ársreikningi 2009 er þess sérstaklega getið að ef fyrningarleiðin verði að veruleika muni það „augljóslega breyta miklu um gjaldfærni félagsins og tefla í tvísýnu virði hlutafjár í félaginu, sem og greiðslugetu þess til núverandi lánardrottna.“
 
Engar framkvæmdir svo lengi sem fyrningarsvipunni er sveiflað
 
• Sigurgeir B. Kristgeirsson, framkvæmdastjóri VSV, segir um afkomu félagsins og stöðu þess í tilefni aðalfundar:
 
„VSV er öflugt félag og rekstur þess gekk vel á árinu 2009, þrátt fyrir áföll á borð við loðnuveiðibann. Ég þakka fyrst og fremst góðu starfsfólki og skilvirku fiskveiðistjórnarkerfi fyrir árangurinn.
 
Þjóðin þarf vissulega á því að halda að sem flest fyrirtæki gangi vel og sjái fólki fyrir atvinnu og þjóðinni fyrir gjaldeyristekjum. Hins vegar virðast ríkisstjórnarflokkarnir ekkert hafa lært og engu hafa gleymt. Þeir sveifla áfram fyrningarsvipu sinni yfir sjávarútveginum og það er ógn sem við hljótum að taka mjög alvarlega.
 
VSV leyfði sér samt þá bjartsýni að kaupa nýlega frystiskipið Gandí, sem gert er út til makrílveiða. Félagið hefur fjárhagslega getu til að ráðast líka í ýmsar framkvæmdir vegna húsa og tækja í landi en við munum ekkert aðhafast í þeim efnum svo lengi sem stjórnvöld hóta okkur fyrningarleiðinni. Rekstur félagsins þolir einfaldlega ekki að farið verði að fyrna aflaheimildir og ríkisvæða þannig sjávarútveginn í áföngum í samræmi við þennan gæfulausa boðskap úr Stjórnarráði Íslands.“
 
 
 

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.

Lumar þú á grein?

15.Febrúar'18

Endilega sendu okkur hana á eyjar@eyjar.net. Eyjar.net - fyrir alla. 

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is