Gleðilega páska með páskahlátri!

séra Kristján Björnsson skrifar

5.Apríl'10 | 07:40

Jesus

Eftir nokkrar vikur föstunnar og eftir síðustu daga dymbilvikunnar er loksins hægt að óska fólki gleðilegrar páskahátíðar. Dymbildagarnir, sem gefa vikunni fyrir páska heiti sitt, eru skírdagur, föstudagurinn langi og hinn helgi laugardagur. Laugardagur þessi er einnig nefndur aðfangadagur páska. Dymbilvikan, sem er einnig nefnd kyrravika, er þessi vika sem nú er liðin og þá taka páskarnir við.
 
Þetta er ekkert mjög flókið en þó getur það vafist fyrir fólki ef það yrði spurt beint út án fyrirvara. Það er ekkert undarlegt, ekki frekar en það hendir marga að spyrja hver sé dáinn þegar það sér íslenska fánann í hálfa stöng um allan bæ á föstudaginn langa. Vinur minn hafði eitt sinn á orði að það hlyti að vera einhver mjög þekktur fallinn frá fyrst flaggað væri svo víða og meira að segja á öllum bensínstöðvum. En til fróðleiks um heiti daganna má minna á að dymbill er trékólfur sem settur var í stað járnkólfsins í kirkjuklukkum til að hægt væri að hringja inn til messu þessa þrjá daga fyrir páskadag, en dumbur er líka sá sem er mállaus.
 
Á páskadagsmorgunn var til siðs til forna að stunda páskahlátur. Fólk kom til kirkju – helst árla dags – en það var þá fyrst sem var við hæfi að hlæja eftir alla alvöruna á föstu og sérstaklega þó í dymbilviku. Þá var það þannig að í messunni gekk presturinn fram og sagði að nú skyldu allir hlæja og hlóu þá allir páskahlátri. Til að hjálpa til við þennan messusið þótti ágætt að segja eitthvað fyndið en það var ekki nauðsynlegt.

Þessi siður hefur ekki verið stundaður nema þá þannig að presturinn reynir að vera ekki mjög alvarlegur og segir jafnvel eitthvað fyndið í prédikun sinni. Það þykir s.s. ekki verra ef hægt er að hlæja eða vera glaður. Dagarnir á undan hafa krafist svo mikillar alvöru við íhugun síðustu kvöldmáltíðar og svo pínu Jesú Krists, að það er kærkomið að fá að hrista það af sér. Meðan þetta var kirkjusiður var páskahláturinn tekinn alvarlega og svo var líka um margt sem átti að gerast eða hitt sem ekki mátti gera þessa miklu hátíðardaga.

Þannig var virðing mikil í því að virða helgi daganna. Fyrir löngu hefur páskahelgin unnið sér sess sem ferða- og orlofshelgi og sést það vel á Fimmvörðuhálsi. Eldfjallið er ekki einu sinni tekið alvarlega, heldur er það tilefni stórkostlegra ferðalaga. Það er ágætt ef fólkið getur skemmt sér eða gert sér þennan dagamun, en það er líka afar mikilvægt að fólk missi ekki alveg tengslin við merkingu daganna. Páskar eru hæsta og mesta hátíð kristinna manna af því að ef Jesú Kristur hefði ekki risið upp frá dauðum gætum við ekki kallað hann Krist. Þá hefði hann ekki reynst vera sá Messías sem spádómarnir sögðu frá. Og ef ekki hefði verið hægt að kalla hann Krist væri heldur ekki nein kristni. Við, sem játum kristni, kennum okkur við Krist af því að hann reis upp frá dauðum og steig síðan upp til himna og situr þar við hægri hönd Guðs föður almáttugs. En af því að hann reis upp og reyndist vera Kristur, sonur hins lifandi Guðs, Drottinn okkar og Frelsari, segjum við gleðilega páska. Og við rekum jafnvel upp góða páskahlátursroku á góðum páskadagsmorgni. Vona ég að sem flestir kristnir menn finni í sér þennan fagnaðarríka boðskap og njóti þess að fagna páskum með mikilli gleði. Það er von mín að það páskarnir verði tími fagnaðar og léttis yfir því hjálpræði sem okkur er þannig búin.

Gleðilega páska!
 
 

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Viðhorfskönnun til samgangna og bæjarmála

2.Nóvember'18

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2018.