Hermann er einn besti atvinnumaðurinn sem ég hef séð

3.Febrúar'10 | 10:48

Avram Grant knattspyrnustjóri Portsmouth segir mjög slæmt fyrir liðið að vera án Hermanns Hreiðarssonar en landsliðsfyrirliðinn er meiddur í hásin og verður ekki með Portsmouth í kvöld þegar það mætir Fulham í ensku úrvalsdeildinni. Grant vonast til að Hermann snúi fljótt til baka.

,,Hermann er einn besti atvinnumaðurinn sem ég hef séð. Hann spilar með hjartanu og er afar jákvæður. Læknir tjáði honum í síðasta mánuði að hann gæti ekki spilað síðustu fjóra leiki okkar en hann spilaði þá alla.

Við þurfum á honum og hans persónuleika að halda inn á völlinn eins fljótt og mögulegt er. Við höldum að hann gæti orðið frá í tvær vikur en þú veist aldrei neitt með Hermann," segir Grant á vef félagsins.

Portsmouth situr eitt og yfirgefið á botni ensku úrvalsdeildarinnar með 15 stig, er fimm stigum á eftir Burnley. Portsmouth sækir Fulham heim í kvöld og mætir síðan Englandsmeisturum Manchester United á Old Trafford á laugardaginn.