Bæjarstjórn Vestmannaeyja klofin í afstöðu til skrifa Kristjáns Möllers samgönguráðherra

15.Janúar'10 | 13:18

xd

Bæjarstjórn Vestmannaeyja fundaði í morgun og m.a. var rætt um opið bréf Kristjáns Möllers til Elliða Vignissonar bæjarstjóra. Fundi bæjarstjórnar sem átti að fara fram í gær var frestað útaf bréfi Kristjáns og var það tekið fyrir í morgun.

Meiri- og minnihluti bæjarstjórnar var greinilega ekki sammála um það hvernig taka átti á málinu en minnihlutinn sat hjá í atkvæðagreiðslunni um málið.

Meirihlutinn samþykkti eftirfarandi ályktun:

Ályktun:
Bæjarstjórn lýsir mikilli undrun á framkomu ráðherra Kristjáns Möller og að hann skuli með þeim setja helstu hagsmuni Vestmannaeyja í farveg vantrausts og flokkspólitískra hagsmuna. Sérstaklega er undarlegt að ráðherra sveitarstjórnarmála sem fer með umboð forseta skv. 13. gr. stjórnarskrárinnar og þar með framkvæmdavald skuli frábiðja sér að vinna áfram með æðsta embættismanni Vestmannaeyjabæjar sem ráðinn er beint af bæjarstjórn Vestmannaeyja og sækir umboð sitt milliliðalaust til hennar. Slíkt er án efa fordæmalaust.

Í opnu bréfi ráðherra samgöngu- og sveitarstjórnarmála er bæjarstjóri einn gerður ábyrgur fyrir samhljóða samþykktum bæjarráðs og bæjarstjórnar og meðal annars sagt að beðið hafi verið eftir tillögum frá bæjarstóra um hvaða ferðir Herjólfs skyldi fella niður. Þar fer ráðherra með rangt mál. Þessi orð og afstaða ráðherra bendir til þess að hann þekki ekki efni tölvupósta senda honum 3. desember, 15. Desember 2009 og 4. janúar sl.. Kann það að skýra hvers vegna hann hefur ekki svarað þeim þrátt fyrir að í þeim sé óskað eftir viðbrögðum eins fljótt og verða má. Ráðherra skal því bent á að bæjarráð fjallaði um málið á fundi sínum 3. desember síðastliðinn og fól bæjarstjóra að svara rekstrarstjóra Eimskipa (er skrifaði bæjarráði) og gera grein fyrir þeirri afstöðu bæjarráðs að það muni ekki taka afstöðu til þess hvort eða hvaða ferðir verði felldar niður fyrr en tilkynning um slíka ákvörðun berst frá samgönguyfirvöldum. Sú ákvörðun barst 8. janúar síðastliðinn og var afgreidd af bæjarráði 12. janúar. Skjalastjóri Vestmannaeyjabæjar sendi síðan afrit af fundargerð til samgönguráðherra, Vegagerðarinnar og Eimskipa (afrit afhent bæjarfulltrúum).

Bæjarstjórn lýsir fullum stuðningi við bæjarstjóra og telur hann í einu og öllu hafa gætt hagsmuna bæjarfélagsins í því máli sem hér um ræðir. Þá minnir bæjarstjórn ráðherra á að bæjarstjóri hefur einungis gert fjölmiðlum grein fyrir einarðri afstöðu bæjarstjórnar og bæjarráðs og í engu vikið frá samþykktum þeirra. Sérstök ástæða er til að geta þess að öll efnisleg afstaða bæjarstjóra sem vísað er til í opnu bréfi ráðherra á sér grunn í einróma samþykktum bæjarstjórnar og bæjarráðs. Bæjarstjórn lítur svo á að afstaða samgönguráðherra til bæjarstjóra sé afstaða hans til lýðræðislega kjörinnar bæjarstjórnar í Vestmannaeyjum og óttast að framkoma ráðherra kunni að skaða trúverðugleika hans sem ráðherra og valdi alvarlegum trúnaðarbresti milli Vestmannaeyjabæjar og samgönguráðherra. Trúnaðarbrest sem torveldar Vestmannaeyjabæ að gæta hagsmuna sinna gagnvart því ráðuneyti sem um ræðir, en það fer einnig með sveitastjórnarmál.

Bæjarstjórn hvetur ráðherra samgöngu- og sveitarstjórnarmála til að gæta að því að samskipti ráðherra og bæjarstjóra eru samskipti ríkis og sveitarfélags. Í svörum bæjarstjóra til fjölmiðla sem vikið er að í opnu bréfi ráðherra er hvergi vegið að persónu ráðherra þótt sannarlega hafi þar verið kveðið fastar að um embættisfærslur en venja er. Bæjarstjórn hvetur því ráðherra til að biðjast afsökunar á orðum sínum og svara þeim embættiserindum sem til hans er beint með hagsmuni umbjóðenda sinna að leiðarljósi.

Páley Borgþórsdóttir
Páll Marvin Jónsson
Gunnlaugur Grettisson
Arnar Sigurmundsson

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Lumar þú á grein?

15.Febrúar'18

Endilega sendu okkur hana á eyjar@eyjar.net. Eyjar.net - fyrir alla.