Ár framkvæmda og uppbyggingar í Vestmannaeyjum-

18.Desember'09 | 11:17

Vestmannaeyjabær bærinn eyjar

Bæjarstjórn Vestmannaeyja samþykkti í gær fjárhagsáætlun fyrir árið 2010.

Í fjárhagsáætlun Vestmannaeyjabæjar fyrir árið 2010 er gert ráð fyrir að A-hluti sveitarsjóðs skili afgangi upp á rúmar 132 milljónir. Þó er gert ráð fyrir að útsvarstekjur verði tæplega 10% minni en rauntekjur útsvars vegna ársins 2009.  Tekjuáætlun er því varfærin.  Gert er ráð fyrir að heildarframlög frá Jöfnunarsjóði verði 2% lægri en þau voru árið 2009, en borið saman við heildarframlög Jöfnunarsjóðs árið 2008 er gert ráð fyrir tæplega 44% lækkun framlaga frá sjóðnum.
Þegar að búið er að taka tillit til reksturs B-hluta stofnana er gert ráð fyrir að samanlagður afgangur verði upp á rúmar 14 milljónir króna. Gert er ráð fyrir að heildar veltufé frá rekstri verði tæpar 441 milljón hjá samstæðunni. Á árinu 2009 var greidd inn á höfuðstól lána rúmlega 740 milljónir, þetta hefur þau áhrif að næsta árs afborganir langtímalána lækka verulega. Lán aðalsjóðs Vestmannaeyjabæjar hafa því verið greidd niður um tæpar 2200 milljónir á þremur árum og eru heildar skuldir (án lífeyrisskuldbindinga og skuldbindinga við Fasteign hf.) rúmlega 1,3 milljarður eða innan við 33 þúsund krónur á íbúa.
Í árslok 2009 eru langtímaskuldir við lánastofnanir um 720 milljónir en er gert ráð fyrir þær verði komnar niður í 686 milljónir í árslok 2010.

Gert er ráð fyrir að ráðist verði í fjárfestingar á árinu 2010 hjá A-hluta fyrir 519 milljónir og að teknu tilliti B-hluta stofnana er gert ráð fyrir að heildarfjárfestingar á árinu 2010 verði 889 milljónir. Ekki er gert ráð fyrir að tekin verði ný langtímalán vegna þessara framkvæmda, heldur verða þær alfarið fjármagnaðar með veltufé frá rekstri og handbæru eigin fé sveitarfélagins. Gert er ráð fyrir að handbært fé í árslok, að afloknum framkvæmdum, verði rúmir 3,5 milljarðar.
Stærstu einstöku liðirnir í fjárhagsáætlun Vestmannaeyjabæjar fyrir áið 2010 eru endurgerð upptökumannvirkis hafnarinnar (370 milljónir), fjölnota íþróttahús (340 milljónir) og framkvæmdir vegna menningarsamnings og safnastarf (Sæheimar [fiskasafn] 50 milljónir, Sagnheimar [byggðasafn] 73 milljónir, Eldheimar [heimaeyjargos] 23 milljónir. Alls 138 milljónir til samningsins), útivistarsvæði við Íþróttamiðstöð (50 milljónir) og fl. Ýmsar rekstrarlegar nýungar eru líka í fjárhagsáætlun svo sem 6 milljónir til gæðaeflingar í grunnskóla starfi og 20 milljónir til að mæta biðlistum eftir leikskólaplássi.

Ástæða er til að ítreka að verði þessum fjármunum öllum (889 milljónum) varið til þessara framkvæmda þá verður handbært fé í árslok samt sem áður 3.555 milljónir (Vestmannaeyjabær seldi í HS fyrir 3200 milljónir [nettó] og hefur greitt upp lán fyrir 2200 milljónir).
Skýringin á núverandi velgengni er tvíþætt. Annarsvegar hefur vel árað í sjávarútvegi eftir langt erfitt skeið vegna sterks gengis krónunnar. Í Vestmannaeyjum eins og í öðrum sjávarbyggðum njóta allir bæjarbúa njóta góðs af þegar vel árar hjá sjávarútvegsfyrirtækjum vegna hækkandi tekna og aukinna umsvifa. Hinsvegar er skýringin sú að á þenslutímanum hélt Vestmannaeyjabær að sér höndum í framkvæmdum og nýtti umhverfið á fjármagnsmarkaði til að hagræða í eiginarsafni sínu. Verðmætar eignir voru seldar og þeim snúið í peningalegar eignir. Lán voru greidd niður og áhersla lögð á niðurgreiðslu erlendra lána. Árið 2007 greiddi Vestmannaeyjabær niður seinustu erlendu lánin. Þá voru peningalegar eignir ávaxtaðar í öruggum en arðbærum sjóðum og inneignum. Það varð til þess að þrátt fyrir miklar fjármagnstekjur tapaði Vestmannaeyjabær ekki á bankahruninu. Nú þegar harðnar á dalnum og kreppir að í atvinnulífinu er rétti tíminn fyrir opinbera aðila að framkvæmda. Það er því ljóst að árið 2010 verður ár framkvæmda og uppbyggingar í Vestmannaeyjum.

Elliði Vignisson
bæjarstjóri

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Lumar þú á grein?

15.Febrúar'18

Endilega sendu okkur hana á eyjar@eyjar.net. Eyjar.net - fyrir alla. 

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.