Ein spurning og eitt svar dugar

27.Nóvember'09 | 10:56

írís

NÚ ERU Íslendingar búnir að senda til Brussel tæplega 9.000 blaðsíður af svörum við 2.500 spurningum Evrópusambandsins vegna umsóknar okkar um aðild að ESB. Og á næsta ári ætlum við samkvæmt fjárlagafrumvarpinu að eyða 250 milljónum króna til að ræða málin á grundvelli þessara spurninga og svara. Gott og vel. Það má færa ákveðin pólitísk rök fyrir því að úr því sem komið er sé best að láta málið renna sitt skeið til enda í þessum farvegi.
Það hefði samt verið miklu fljótlegra, skynsamlegra og ódýrara að senda bara eina spurningu og biðja um bara eitt svar, sem hvorttveggja hefði komist fyrir á einni blaðsíðu. Og hlutverkunum hefði verið snúið við: spurningin hefði komið frá Reykjavík og svarið frá Brussel.

Spurningin er einföld: Er Evrópusambandið reiðubúið að tryggja Íslendingum varanleg yfirráð yfir fiskveiðilögsögu sinni og endanlega stjórn fiskveiða innan hennar?

Ef svarið yrði já væri réttlætanlegt að halda samningaferlinu áfram og bera síðan niðurstöðuna undir þjóðina í atkvæðagreiðslu. Ef svarið væri nei er allt ferlið hrein tíma- og peningasóun. Ef þessi yfirráð yfir fiskimiðunum væru ekki fullkomlega tryggð er morgunljóst að aðild að Evrópusambandinu yrði kolfelld í þjóðaratkvæðagreiðslu, hvert svo sem innihald samningsins yrði að öðru leyti. Og sú afstaða þjóðarinnar væri fullkomlega eðlileg út frá hreinum efnahagslegum hagsmunum, - burtséð frá ójarðbundnari hugtökum á borð við sjálfstæði og sjálfsákvörðunarrétt. Þjóðin er nefnilega að enduruppgötva þau grundvallarsannindi að sjávarafurðir eru enn sem fyrr helsta útflutningsvara okkar - og stærsta einstaka uppspretta þess erlenda gjaldeyris sem við þurfum til að geta flutt vörur til landsins. Um 45% af útflutningstekjum þjóðarinnar það sem af er árinu koma úr sjávarútvegi.

Ákvörðunarvald um þessa hagsmuni og þessi verðmæti getum við aldrei framselt.

Engar vísbendingar eru um að mikilvægi sjávarútvegs fyrir verðmætasköpun á Íslandi fari minnkandi á næstunni. Þvert á móti. Eftirspurn eftir hágæða fiskafurðum fer vaxandi, framboðið minnkandi og verðið hækkandi. Fólki í hinni talandi og skrifandi stétt í 101 Reykjavík - sem heldur kannski að gjaldeyrisöflunin felist helst í því að lesa bókarhandrit og prófarkir hvert fyrir annað - finnst þetta ábyggilega hallærislegt og jafnvel svolítið subbulegt, en svona er það nú samt. Það munu allavega þurfa að líða nokkrir mannsaldrar áður en hægt verður að telja þjóðinni trú um það aftur, að Ísland sé að verða fjármálamiðstöð heimsins og sjávarútvegur sé úreltur og óþarfur. Þess vegna mun afstaða þjóðarinnar til Evrópusambandsins ráðast „á sjó".

Höfundur er grunnskólakennari og varaþingmaður Sjálfstæðisflokksins.

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Viðhorfskönnun til samgangna og bæjarmála

2.Nóvember'18

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2018.

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.