Eftir að nýta 9,5% þorskkvótans þegar mánuður er eftir af fiskveiðiárinu

18.Ágúst'09 | 07:37

Þorskur fiskur

Afli íslenskra skipa í botnfiski var í júlí 36.280 tonn, mestur var aflinn í þorski, þar á eftir í úthafskarfa. Nú þegar mánuður er eftir af fiskveiðiárinu eru 9,5% af því aflamarki sem til ráðstöfunar er í þorski ónýtt, aflmarksskip eiga 8,8% ónýtt og krókaflamarksskip 12,6%, að því er fram kemur í frétt frá Fiskistofu.

Á sama tíma í fyrra var 9,7% af úthlutuðu aflamarki í þroski ónýtt en úthlutað aflamark í þorski var töluvert lægra á síðasta fiskveiðiári en það er nú. Úthlutað aflamark í karfa, löngu, keilu og þykkvalúru voru fullnýtt í júlí og óverulegt magn var eftir af steinbít. Þetta er nokkur breyting á milli fiskveiðiára því á sama tíma í fyrra var eingöngu búið að fullnýta aflaheimildir í steinbít. Eins má merkja mun í veiðum á úthafskarfa en í júlí í ár var landað 7.042 tonnum samanborið við 1.205 tonn í fyrra. Afli úthafskarfa á fiskveiðiárinu er því rúmum 6.000 tonnum meiri en á sama tíma í fyrra og eru aflaheimildirnar nú nánast fullnýttar. Af heildaraflamarki í þorskígildum talið eru í lok júlí 13% af heimildum til ráðstöfunar ónýttar samanborið við 29% á sama tíma í fyrra.

 

Strandveiðar

 Í júní voru strandveiðar heimilaðar á fjórum skilgreindum veiðisvæðum í kringum landið. Hvert landssvæði fékk til ráðstöfunar þorskaflaviðmiðun eftir mánuðum. Strandveiðibátar veiddu alls 1.603 tonn af þorski í júlí sem er tæplega 74% af heildarþorskaflaviðmiði júlí mánaðar fyrir strandveiðibáta. Eingöngu eitt veiðisvæði, svæði A, fullnýtti þorskaflaviðmiðun sína. Nánari upplýsingar um afla eftir tegundum og veiðisvæðum má finna á vef Fiskistofu.

 

Uppsjávartegundir

 Afli í uppsjávartegundum var 122.579 tonn í júlí. Aflaheimildir uppsjávartegunda miðast við almanaksár. Uppistaða aflans í júlí er norsk íslensk síld og makríll. Ekki er um að ræða úthlutaðar aflaheimildir í makríl en veiðiviðmið skv. reglugerð er 112.000 tonn á árinu 2009, í lok júlí hafði verið veitt 92,7% þess viðmiðs. Um 50% af aflaheimildum til ráðstöfunar í norsk íslenskri síld eru ónýttar þegar fimm mánuðir eru eftir af árinu. Þess ber þó að geta að hluti þeirra eru heimildir íslenskra skipa til veiða í norskri lögsögu.

 

Afli utan aflamarks

 Nokkur aukning er í afla utan aflamarks á milli fiskveiðiára og er það að mestu tilkomið með heimildum til strandveiða. Jafnframt hefur orðið 32% aukning á svo kölluðum VS - afla á fiskveiðiárinu samanborið við fiskveiðiárið 2007/2008, aukninguna er helst að merkja í þorski. Undirmálsafli utan aflamarks á tímabilinu september til júlí er minni í ár en í fyrra, 40% minna af ýsu er landað sem undirmáli það sem af er árs samanborið við síðasta fiskveiðiár.

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.