Hrikaleg staða hjá mörgum sveitarfélögum

24.Júlí'09 | 08:21
Eins og gefur að skilja eru sveitarfélög rétt eins og fyrirtæki og heimili nú að ganga í gegnum erfiða tíma.  Kristján L. Möller, samgönguráðherra var á þingfundi í dag spurður um afkomu sveitarfélaga og horfur.  Í svari hans kom fram að afkoma sveitarfélaga landsins hafi verið neikvæð um samtals 109,5 milljarða króna á seinasta ári.
Ef aðeins er litið á afkomu sveitarsjóða nam tapið tæplega 19,3 milljörðum árið 2008. Mbl.is greindi svo frá því að tap af rekstri bæjarsjóðs Kópavogs, svokölluðum A-hluta, nam 8,2 milljörðum króna árið 2008 en rekstrarniðurstaða sjö sveitarsjóða var neikvæð um einn milljarð króna eða meira í fyrra. Þetta eru auk Kópavogs, Hafnarfjarðarkaupstaður (- 2,13 milljarðar), Reykjanesbær (-3,05 milljarðar), Akraneskaupstaður (-1,19 milljarðar), Akureyrarkaupstaður (-2,15 milljarðar), Fjarðabyggð (-1,14 milljarðar) og Sveitarfélagið Árborg (- 1,2 milljarðar). Vestmannaeyjabær siglir hinsvegar mjög ólíka leið í þessum ólgusjó. Rekstrarniðurstaða A - hluta Vestmannaeyjabæjar var jákvæður um 436 milljónir. Fyrir einungis þremur árum (2006) var staðan þó mikið verri því þá var A - hlutinn rekinn með 97 milljóna tapi.

Elliði Vignisson bæjarstjóri segir að skýringin á þessari góðu stöðu Vestmannaeyjabæjar og þeim viðsnúningi sem orðið hefur sé margþætt. "Miklu skiptir náttúrulega ákvörðun okkar um að hagræða í eignasafni okkar og selja frá okkur verðmætan hlut í Hitaveitu Suðurnesja. Sú ákvörðun var að sjálfsögðu umdeild þegar við tókum hana mitt í góðærinu 2007 og margir töldu það glapræði að bíða ekki og fljóta í átt til enn frekari auðs. Við völdum hinsvegar öruggu leiðina og sjáum ekki eftir því. Strax eftir þá aðgerð réðumst við í algera endurskoðun á öllum okkar lánamálum og keyptum upp öll erlend lán. Við keyptum til að mynda upp stórt dollaralán þegar dollarinn stóð í 59 krónum. Dollarinn er í dag um 127 krónur. Þá höfum við einnig greitt niður óhagstæð íslensk lán. Þetta hefur að sjálfsögðu skilað sér í lægri fjármagnskostnaði en það er einmitt hann sem er að sliga sveitarfélög í dag."

Elliði segir að samhliða þessu hafi verið ráðist í hagræðingaaðgerðir í rekstri. "Þar munar mestu um breytingar í skólamálum svo sem aldursskiptingu grunnskólans og sameiningu Sóla og Rauðagerðis. Þá höfum við einnig lagt niður margar stöður stjórnenda og það skilar mikilli hagræðingu. Mestu af öllu skiptir þó hversu vel hefur gengið til sjávar og þau öflugu fyrirtæki sem hér eru skila okkur nánast öllum okkar rekstrartekjum." Að lokum sagði bæjarstjórinn bæjarbúa hafa tekið höndum saman og snúið vörn í sókn í sátt og samlyndi. "Litlum deilum um keisarans skegg hefur nánast verið algerlega vikið til hliðar fyrir því sem meira skiptir. Þannig er hagur Eyjanna líka best tryggður."

Viðhorfskönnun til samgangna og bæjarmála

2.Nóvember'18

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2018.

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.