Satt og rétt

28.Maí'09 | 12:59

Páley

Mér hefur blöskrað óheiðarleiki oddvita V-listans í umræðu síðustu daga um ráðningar í íþróttamiðstöðinni. Páll Scheving sat með mér á fundi bæjarráðs 20. maí sl. þegar framkvæmdastjóri stjórnsýslusviðs lagði fram samningamál fyrir bæjarráð, tvo ráðningasamninga til kynningar.

Engar umræður fóru fram um ráðningarnar eða athugasemdir gerðar enda var ráðningin á hendi framkvæmdastjóra fjölskyldusviðs og hann þegar búinn að ráða í stöðurnar. Ég er ekki ein til vitnis um þennan fund, hann sat fullskipað bæjarráð auk starfsmanns sem ekki er pólitískur fulltrúi. Samningarnir voru sem sagt lagðir fram til kynningar, engin umfjöllun fór fram í bæjarráði og engin ákvörðun tekin. Til vitnis um þetta er einnig fundargerð bæjarráðs og bókun í samningabók þar sem segir ,,Ráðningarsamningar til kynningar". 

Á bæjarstjórnarfundi síðar sama dag óskaði V-listi eftir umræðu um ráðningar í íþróttamiðstöðinni og þá ber að geta þess að enga ákvörðun stóð til að taka um ráðningar. Ákvörðun um slíkt hafði framkvæmdarstjóri þegar tekið og kynnt í bæjarráði. Við Elliði ætluðum okkur aldrei að ræða ráðningar okkar nánustu og þess vegna var Páll Scheving inntur eftir því hvað ætti að ræða. Samskipti okkar á milli hafa verið góð og ákveðið traust ríkt á milli fylkinga. Svar Páls Scheving var ,,við ætlum bara að ræða verkferla við ráðningar". Við treystum því sem var svo raunin, verklag var rætt. Engin ákvörðun tekin, engin atkvæðagreiðsla. Ekki heldur umræður um vanhæfi. Í upphafi fundarins tók Gunnlaugur Grettisson, forseti bæjarstjórnar það einnig fram að ef ræða ætti einstaka starfsmenn yrði eðlilega að loka fundinum. Páll Scheving sagði einnig þá að ekki stæði til að ræða einstaka starfsmenn.

Viku síðar kom svo fram ásökun í fjölmiðlum frá Páli Scheving um að við höfum hugsanlega brotið lög með því að víkja ekki sæti þegar ráðningarnar voru ræddar og samþykktar. Er það svo að Páll Scheving áttar sig ekki á því hvort mál eru til kynningar eða ákvörðunar eða er það svo að hann er óheiðarlegur og segir ekki satt og rétt frá? Hvaða umræðu er hann að vísa til í bæjarráði þegar engin umræða fór fram.


Víst var ég vöruð við því þegar ég fór út í pólitík að hún væri óttaleg tík en ég trúi því að með opinni stjórnsýslu, faglegum vinnubrögðum og heiðarleika megi forðast leiðindin. Nú hefur oddviti V-listans sýnt sitt rétta andlit og við verðum öll vör við það að nú styttist í sveitarstjórnarkosningar. Það sem mér svíður mest er að þessi umfjöllun skaðar Vestmannaeyjar. Ég vona að okkur beri gæfu til að forðast slíka neikvæða umfjöllun þrátt fyrir yfirvofandi kosningar.


Páley Borgþórsdóttir, formaður bæjarráðs.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Lumar þú á grein?

15.Febrúar'18

Endilega sendu okkur hana á eyjar@eyjar.net. Eyjar.net - fyrir alla. 

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.