Sjávarútvegsstefna Samfylkingarinnar þegar farin að hafa skaðleg áhrif

23.Maí'09 | 08:12

Kap ve VSV

Undirritaðir bæjarfulltrúar í Vestmannaeyjum harma viðbrögð þingmanna Samfylkingarinnar við ályktunum sveitarstjórna um hina svo kölluðu fyrningarleið.  Umræðan að verið sé að standa vörð um sérhagsmuni eru fjarstæðukennd enda er hlutverk sveitarstjórnarmanna að gæta að hagsmunum sinna sveitarfélaga.  Ekki er hægt að sitja undir aðdróttunum þingmanna Samfylkingarinnar um annað. 

Eftirfarandi staðir eru meðal þeirra sem eindregið leggjast gegn sjávarútvegsstefnu Samfylkingarinnar: Arnarstapi, Bakkafjörður, Eskifjörður, Fáskrúðsfjörður, Grenivík, Grindavík, Grímsey, Grundarfjörður, Hellissandur, Hofsós,  Ólafsvík, Neskaupstaður, Mjóifjörður, Rif, Reyðarfjörður, Sauðárkrókur, Seyðisfjörður, Stöðvarfjörður, Tálknafjörður, Vestmannaeyjar, Þorlákshöfn, Þórshöfn. Að halda því fram að sveitarstjórnarmenn á þessum stöðum séu í sérhagsmunagæslu en ekki að gæta hagsmuna sinna bæjarfélaga er lágkúruleg leið til að draga fjöður yfir vondan málstað.

Staðreyndin er sú að fyrningarleiðin mun setja atvinnulíf þessara útgerðarbæja í rekstrarvanda á örfáum árum og gera þau gjaldþrota á 7 árum.  Nú þegar eru íbúar sjávarbyggða farnir að verða varir við skaðleg áhrif þessarar stefnu því útgerðir halda nú að sér höndum í öllum framkvæmdum og þróunarverkefnum.  Slíkt er skiljanlegt þegar ríkisstjórn stefnir að því að gera þessar sömu útgerðir gjaldþrota.  Þetta bitnar fyrst og fremst á íbúum í sjávarplássum á landsbyggðinni sem með þessu sogast af auknu afli inn í höfuðborgarkreppuna.

Andstætt við það sem virðist vera meðal ákveðinna stjórnmálamanna þá hafa íbúar landsbyggðarinnar skilning á því að hagsmunir samfélagsins og hagsmunir atvinnulífsins, þar með talið útgerðanna fara saman.  Það er sameiginlegt hlutverk kjörinna fulltrúa, bæði á sveitastjórnarstigi sem og alþingi, að styðja við bakið á atvinnulífinu launþegum og íbúum til heilla.

Undirritaðir bæjarfulltrúar harma einnig þá afbökun sem á sér stað í máli óvandaðra þingmanna sem aldrei geta rætt sjávarútveg án þess að rægja útgerðarmenn en líta hjá því að um leið er verið að rægja atvinnulíf landsbyggðarinnar og íbúa þar.

Að lokum skal á það minnt að fiskveiðistjórnunarkerfið er mannanna verk og bæjarstjórn Vestmannaeyja hefur lýst því yfir að mikilvægt sé að það sé sífellt til endurskoðunar en þó þannig að stöðugleika sé gætt, bæði fyrir fyrirtækin, starfsmennina og ekki síst íbúa sveitarfélaga sem eiga allt sitt undir.  Vilji bæjarstjórnar Vestmannaeyja og hagsmunaðila í Vestmannaeyjum er að skapa vinnufrið um sjávarútveg - útgerð og fiskvinnslu þannig að horfa megi til lengri tíma. Hin sameiginlega sannfæring er að sjávarútvegurinn gegni lykilhlutverki í endurreisn hagkerfisins og það sé ólíðandi ábyrgðarleysi að ráðast að undirstöðum burðaráss íslensks atvinnulífs nú þegar þjóðin þarf á öllu sínu að halda.  Fyrningaleið Samfylkingarinnar er andstæð hagsmunum Vestmannaeyja og hefur henni verið einróma hafnað af bæjarstjórn Vestmannaeyja.

Undirrituð ætlast til þess að þingmenn Samfylkingarinnar sýni skoðunum sveitarstjórnarmanna tilhlýðanlega virðingu.  Þeir eru kosnir af íbúum sveitarfélagana og hafa þekkingu á hagsmunum bæjarfélaga þeirra sem þeir starfa fyrir.  Það er vegna þessarar þekkingar sem fyrningarleiðinni hefur verið hafnað af svo mörgum sveitarfélögum.

Elliði Vignisson, bæjarfulltrúi og bæjarstjóri í Vestmannaeyjum
Gunnlaugur Grettisson, bæjarfulltrúi og forseti bæjarstjórnar í Vestmannaeyjum
Páley Borgþórsdóttir, bæjarfulltrúi og formaður bæjarráðs í Vestmannaeyjum
Páll Marvin Jónsson, bæjarfulltrúi og fulltrúi í bæjarráði í Vestmannaeyjum

Lumar þú á grein?

15.Febrúar'18

Endilega sendu okkur hana á eyjar@eyjar.net. Eyjar.net - fyrir alla. 

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.