Sjósvölur og lundar í sambýli

14.Maí'09 | 08:17

Lundir lundar

SAMBÝLI stóru sjósvölu og lunda í Elliðaey í Vestmannaeyjum hefur vakið athygli vísindamanna. Í sumar á að rannsaka þetta sambýli betur með aðstoð holumyndavélar, að sögn dr. Erps Snæs Hansens, sviðsstjóra vistfræðirannsókna hjá Náttúrustofu Suðurlands. Sjósvölurnar virðast notfæra sér dugnað lundans við holugröft og gera sér hreiður í lundaholum.

Lundinn er svo innar í holunni sem getur verið meira en 1,5 metra djúp. Lundinn er þrifalegur og útbýr afdrep þar sem pysjan gerir þarfir sínar. Sambýli lunda og sjósvölu af því tagi sem sést hefur í Elliðaey er ekki þekkt annars staðar, að sögn Erps.

Stórar fuglabyggðir
Í Vestmannaeyjum er stærsta lundabyggð í heimi og áætlað að þar sé meira en 1,1 milljón lundahola. Ábúðarhlutfallið, þ.e. hlutfall þeirra para sem verpa, er breytilegt milli ára. Í fyrra var það talið vera 62% og varpstofninn samkvæmt því um 704 þúsund pör.

Stærsta sjósvölubyggð Evrópu er einnig í Vestmannaeyjum. Fjöldi sjósvala þar er áætlaður a.m.k. 150 þúsund pör, en þær gætu verið fleiri að mati Erps. Sjósvalan er þekkt við Atlantshaf og Kyrrahaf. Stærstu byggðir sjósvölu við Atlandshaf eru á eyjum við austurströnd Kanada.

Erpur sagði niðurstöður frumrannsókna í Elliðaey gefa til kynna að útbreiðsla og þéttleiki sjósvölunnar fylgi útbreiðslu og þéttleika lundans. Ætlunin er að kanna þetta í fleiri eyjum Vestmannaeyja.

Lundinn í Vestmannaeyjum hefur átt erfitt uppdráttar undanfarin sumur og fáar pysjur komist upp. Lundavarpinu seinkaði sumarið 2007 um þrjár vikur. Það er mesta seinkun sem sést hefur frá árinu 1971. Könnun þá leiddi í ljós að ekki voru nema 39% af holunum í gangi sem varpholur. Erfiðleikar lundans eru aðallega raktir til skorts á æti, en sandsíli er uppistaðan í fæði lundans í Vestmannaeyjum.

Fæðuskortur og urðarkettir
Erpur sagði vísbendingar um að erfiðlega gangi hjá skrofunum í Ystakletti. Þar er ekki ætisskorti kennt um heldur urðarköttum og að þeir drepi skrofurnar. Kattagreni hafa fundist í skrofuholum og í þeim verið fuglahræ. Einu kattagreni var eytt í Ystakletti í fyrra. Meindýraeyðir Vestmannaeyjabæjar veiddi um 50 ketti á Eiðinu í fyrra en þaðan hefðu þeir getað farið í fuglabyggðirnar í Heimakletti, Miðkletti og Ystakletti. Um var að ræða kettlinga sem enn voru með mjólkurtennur og höfðu því líklega verið bornir út.

Í hnotskurn
» Stóra sjósvala er um 22 sentimetra löng og vegur ekki nema 40-50 grömm. Hún er sjófugl og kemur aðeins til lands um varptímann.
» Sjósvalan er helst á ferli á nóttinni og því sjaldséð í björtu. Aðalvarpstöðvar hennar hér á landi eru í Vestmannaeyjum.
» Skrofur verpa hér á landi aðeins í Ystakletti í Vestmannaeyjum. Þær verpa í holum líkt og lundinn og sjósvalan.
» Fullvaxin skrofa er um 30-38 sentimetra löng og vegur um 300 - 500 grömm hver fugl.

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.