Einn ökumaður var stöðvaður vegna gruns um akstur undir áhrifum fíkniefna

21.Apríl'09 | 08:58

Lögreglan,

Vikan var frekar róleg hjá lögreglu og ekkert um alvarleg mál sem upp komu. Við eftirlit með veitingastöðum bæjarins var einum aðila sem ekki hafði aldur til að vera þar inni vísað út en annars fór skemmtanahald helgarinnar vel fram. Þá var eitthvað um stympingar á milli manna en engar kærur liggja fyrir.

Einn ökumaður var stöðvaður vegna gruns um akstur undir áhrifum fíkniefna. Fimm ökumenn fengu sekt fyrir ólöglega lagningu ökutækja sinna, þar af fjórir í Skvísusundi. Þá var einn ökumaður staðin að hraðakstri á Strandvegi en hann mældist á 91 km/klst. en eins og ökumenn eiga að vita er hámarkshraði á Strandvegi 50 km/klst.

Þann 16. apríl sl.var lögreglu tilkynnt um að ekið hafi verið utan í bifreið sem stóð á bifreiðastæðinu við Sjúkrahúsið. Sá er tjóninu olli stakk hins vegar af án þess að tilkynna um atvikið. Talið er að atvikið hafi átt sér stað þann 16. apríl sl. á milli kl. 09:00 og 10:00.

Þann 19. apríl sl. var lögreglu tilkynnt um að ekið hafi verið utan í bifreið sem stóð á bifreiðastæðinu við Vöruval og hafði sá sem tjóninu olli ekki fyrir því að tilkynna um óhappið. Lögreglan hvetur þá sem einhverjar upplýsingar hafa um þessi tvö tilvik um að hafa samband.