Gerum upp fortíðina - Horfum fram á við!

17.Apríl'09 | 14:46

Raggi Óskars, Ragnar óskarsson

Mér þótti vænt um að sjá í fjölmiðlum að Elliði Vignisson bæjarstjóri hefur skrifað Ögmundi Jónssyni heilbrigðisráðherra bréf þar sem hann hvetur ráðherrann  til þess að beita sér fyrir því að við Vestmannaeyingar þurfum ekki að búa við skerta heilbrigðisþjónustu um skeið næstkomandi sumar. Við eigum auðvitað að krefjast þess að hér sé fullnægjandi heilsugæsla og nota öll tækifæri sem gefast til þess að koma þeim baráttumálum okkar á framfæri.
Ég tel ástæðu til þess að ætla að Ögmundur muni gera allt sem hann getur til þess að tryggja okkur Eyjamönnum fullnægjandi heilsugæslu. Fyrir skemmstu ákvað Ögmundur að hverfa frá því fráleita fyrirkomulagi sem Guðlaugur Þ. Þórðarson fyrrverandi heilbrigðisráðherra hafði ákveðið, að færa stjórn Heilbrigðisstofnunar Vestmannaeyja burt frá Eyjum og upp á Suðurland. Jafnframt ákvað Ögmundur að fella niður sérstakan sjúklingaskatt sem Guðlaugur hafði ákveðið að leggja á þá sem þyrftu að leggjast inn á sjúkrahús. Með þessum ákvörðunum sínum sýndi Ögmundur í verki þá stefnu sem hann aðhyllist, sem sé að standa vörð um almenna heilsugæslu í landinu. Þess vegna er ég sannfærður um að hann muni hér eftir sem hingað til leggja sitt af mörkum til þess að við Vestmannaeyingar búum við þá heilsugæslu sem fullnægir okkar þörfum. Það var því í raun mikið happ að Guðlaugur Þór skyldi ekki endast í embætti heilbrigðisráðherra lengur en raun bar vitni um. Stefna Sjálfstæðisflokksins í hans höndum hefði haft skelfilegar afleiðingar fyrir heilbrigðiskerfi landsmanna, ekki síst okkar Vestmannaeyinga.

Mér þótti líka vænt um fyrirsögn á grein sem Íris Róbertsdóttir skrifar í fjölmiða og ég las í morgun. Fyrirsögnin er: „Gerum upp við fortíðina en kjósum um framtíðina." Ég held að þessi fyrirsögn sé einmitt lýsandi fyrir það sem þarf að gera. Fortíðin er hins vegar Sjálfstæðisflokkurinn og hans stjórnarhættir síðustu áratugi, stjórnarhættir sem leitt hafa miklar hörmungar yfir þjóðina. Besta uppgjör við þá fortíð er að við lofum okkur því að kjósa ekki Sjálfstæðisflokkinn til valda að nýju og gerum þannig upp. Kjósum okkur heldur nýja og bjartari framtíð, framtíð sem m.a. stefnir að því að hverfa frá því óréttláta þjóðfélagi sem Sjálfstæðisflokkurinn hefur yfir okkur leitt í stjórnartíð sinni, og koma á þjóðfélagi þar sem almannahagsmunir eru teknir fram fyrir sérhagsmuni.

Ragnar Óskarsson

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Lumar þú á grein?

15.Febrúar'18

Endilega sendu okkur hana á eyjar@eyjar.net. Eyjar.net - fyrir alla. 

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is