Gleymum því ekki

6.Apríl'09 | 06:21

Raggi Óskars, Ragnar óskarsson

Það styttist í Alþingiskosningar. Flokkarnir eru þessa daga að stíga fyrstu skrefin í stuttri kosningabaráttu. Og það er fróðlegt að skoða hvernig sú barátta fer fram. Eitt er sérstaklega áberandi. Bæði Sjálfstæðisflokkurinn og Framsóknarflokkurinn haga málflutningi sínum þannig að engu er líkara en að þeir flokkar eigi nánast enga fortíð, hvað þá að þeir beri með nokkrum hætti ábyrgð á því dapurlega ástandi sem nú ríkir á flestum sviðum þjóðlífsins. Þessu hamra talsmenn flokkanna sífellt á og ætlast til þess að þjóðin trúi boðskapnum og styðji þá til valda á ný eftir kosningar.
 Því er nauðsynlegt að rifja upp ýmsar staðreyndir, m.a. eftirfarandi:
  • Undir forystu Sjálfstæðisflokksins og Framsóknarflokksins voru bankarnir í landinu einkavæddir og þeim skipt á milli góðvina flokkanna tveggja. Öll vitum við nú hvert það leiddi okkur. Þjóðin situr nú uppi með gríðarlegar skuldir vegna þessarar einkavæðingar og ekki er séð fyrir endann á þeim hörmungum öllum sem af þessum gjörðum hlutust.
  • Undir forystu Sjálfstæðisflokksins og Framsóknarflokksins hefur orkuauðlindum landsins verið fórnað á altari erlendar stóriðju. Þess utan hafa erlendu stóriðjueigendurnir fengið orkuna nánast gefins á sama tíma og heimilin í landinu og íslensk atvinnufyrirtæki þurfa að greiða fyrir hana okurverð, ekki síst nú þegar efnahagshrunið leikur íslensk heimili og innlend fyrirtæki eins grátt og raun ber vitni um.
  • Undir forystu Sjálfstæðisflokksins og Framsóknarflokksins hefur fiskveiðistjórnunarkerfið leitt af sér eitt mesta óréttlæti sem um getur í sögunni á nýtingu sameiginlegra auðlinda þjóðarinnar. Fáum útvöldum voru afhend fjöregg þjóðarinnar og með þessi fjöregg hafa þeir getað braskað að vild án þess að þjóðin, eigandinn, njóti þess á nokkurn hátt. Auðmenn, margir hverjir allsendis ótengdir sjávarútvegi og vinnslu, hafa reyndar komist yfir auðlindirnar og flutt þannig gífurlegt fjármagn úr sjávarútvegi í hvers kyns brask.
Hér eru aðeins nefnd örfá dæmi hvernig Sjálfstæðisflokkur og Framsóknarflokur hafa farið með völd sín á Íslandi undanfarna áratugi. Dæmin eru mun fleiri. Hér hafa t.d. ekki verið nefndar fráleitar embættisveitingar til flokksgæðinga flokkanna tveggja og misbeitingu valds á mörgum öðrum sviðum.

Þetta er nauðsynlegt að rifja upp nú þegar nær kosningum dregur, sérstaklega þegar  Sjálfstæðisflokkur og Framsóknarflokkur keppast við að kenna öðrum en sjálfum sér um það alvarlega ástand sem þjóðin stendur frammi fyrir nú um þessar mundir.
Við verðum því í hvert einasta skipti sem talsmenn flokkanna hamra á ágæti sínu að muna eftir hlut  þeirra í efnahagshruninu,  ábyrgð þeirra á því  og afleiðingum þess. Þótt nú komi fram ný andlit flokkanna er stefna þeirra óbreytt.  Og komist þeir til valda að loknum kosningunum í apríl hefjast þeir óhikað og miskunnarlaust handa við að einkavina- og sérhagsmunavæða í þágu hinna fáu á kostnað almennings í landinu og breikka bilið milli þeirra sem lakar standa og hinna sem betur mega sín.  Gleymum því ekki þegar við greiðum atkvæði í kjörklefanum 25. apríl. 

Ragnar Óskarsson

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Lumar þú á grein?

15.Febrúar'18

Endilega sendu okkur hana á eyjar@eyjar.net. Eyjar.net - fyrir alla. 

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.