Eymir enn af gömlum töktum

15.Nóvember'08 | 08:23

Steini Þorsteinn Gunnarsson

Þorsteinn Gunnarsson hefur verið ráðinn markmannsþjálfari allra flokka hjá Grindavík og hann mun einnig vera til aðstoðar í meistaraflokki. Þorsteini var sagt upp störfum hjá Stöð 2 Sport um síðustu mánaðarmót og nú mun hann koma að fótboltanum á annan hátt en hann verður í hlutastarfi hjá Grindavík.

,,Aðstaðan í Grindavík hefur tekið stakkaskiptum með opnun nýja knattspyrnuhússins fyrir skömmu og því verður gaman að vinna að þessum verkefni," sagði Þorsteinn við Fótbolta.net í dag en hann er gamall markvörður sjálfur og ætlar að miðla reynslu sinni.

,,Það eymir eitthvað enn af gömlum töktum sem vonandi er hægt að miðla áfram," sagði Þorsteinn sem kemur til með að aðstoða Milan Stefán Jankovic þjálfara meistaraflokks.

,,Ég sé um markmennina tvo, Óskar (Pétursson) og Ingólf (Ágústsson), sem eru rétt innan við tvítugt og eru með efnilegustu markvörðum landsins. Ég verð hluti af þjálfarateyminu, verð Janko eitthvað innan handar en stefnan er að ráða annan aðstoðarmann þannig að við verðum þrír."

Þorsteinn er enginn nýgræðingur í þjálfun því að hann var á sínum tíma þjálfari hjá ÍBV.

,,Ég byrjaði ungur að þjálfa heima í Eyjum og hef fiktað við þetta af og til síðan enda hef ég ómælda ánægju af þessu. Ég þjálfaði yngstu flokkana, 3. flokk karla og 2. og meistaraflokk kvenna í Eyjum á sínum tíma, mest með Jóni Ólafi Daníelssyni, sem nú er yfirþjálfari yngri flokkanna í Eyjum. Við náðum m.a. að gera 2. flokk að Íslandsmeisturum og koma meistaraflokki upp í efstu deild. Þá var ég spilandi þjálfari hjá stórliði Smástundar eitt sumar en Bjarni Fel sagði í útvarpinu á sínum tíma, eftir að við unnum fyrsta leikinn, að þetta hefði verið stór stund fyrir Smástund."

,,Síðan eru liðin mörg ár en ég hef fylgst sæmilega með þjálfun yngri flokkanna í gegnum börnin mín sem eru í boltanum. En að sjálfsögðu er ég orðinn ryðgaður og þess vegna hef verið í endurmenntun hjá vini mínum Guðmundi Hreiðarssyni, besta markmannsþjálfara landsins, að undanförnu. Við erum skoðanabræður þegar kemur að fyrirkomulagi markmannsþjálfunar, við leggum áherslu á tækni markmanna en ekki herþjálfun."

Þorsteinn er búinn með tvö þjálfarastig og ætlar að halda áfram að afla sér þjálfaramenntunar á næstunni.

,,Ég tók tvö fyrstu KSÍ námskeiðin á sínum tíma en er búinn að skrá mig á það þriðja í janúar og held því að sjálfsögðu áfram. Uppáhalds kennarinn á fyrstu námskeiðunum var Janus Guðlaugsson. Á einu námskeiðinu sagði hann okkur þá sögu að hann hefði verið í vandræðum með samvinnu markvarðar og varnar í 2. flokki KR. Þá datt honum í hug á fundi fyrir úrslitaleik að gefa varnarmönnunum og markverðinum 1000 krónu seðil og sagði þeim að skipta honum á milli sín og fara út í sjoppu í sitt hvoru lagi og kaupa nammi. Strákarnir urðu eitt spurningamerki í framan og sögðu Janusi að þá yrðu þeir að rífa seðilinn í tvennt. 'Alveg hárrétt', sagði Janus, 'þetta er merki um samvinnu strákar' bætti hann við. Þeir fóru út í sjoppu, keyptu nammi og unnu svo FH 4-1. Janus var engum líkur," sagði Þorsteinn að lokum við Fótbolta.net.

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.