Enn blæs hann í Eyjum

19.September'08 | 06:05

Enn er Kári að puðra yfir okkur vindi hér í Eyjum og er flotinn enn í landi en flest allir komu inn á þriðjudag og hafa ekkert farið út síðan. Það er ekki byssuleg spáin fyrir næstu daga og má segja að hér verði skítaveður í að minnsta kosti fram yfir helgi. Hann á reyndar að dúra aðeins á laugardag en svo byrjar að blása aftur á sunnudag. Það er því alveg óhætt að segja að haustið sé komið og það kemur með látum.

Ég fór á bryggjurnar í dag á meðan það var gat á stundartöflunni og fylgdist ég með þegar Brúarfoss kom inn til hafnar. Þeir Eimskipsmenn eru hér alltaf á fimmtudögum og sækja hér fiskinn sem fer á Englandsmarkað. Hvort þeir verði hér næsta fimmtudag verður að koma í ljós en eins og flestir vita þá eru þessir skrattar sem hafa haldið utan um stjórnvöldin í Eimskipafélaginu búnir að vera á einhverju eyðslufylliríi undanfarin ár og er það að koma laglega í bakið á mönnum í dag. Það sem eitt sinn var kallað "draumabarn þjóðarinnar" er að breytast í martröð og gjaldfalla milljarðarnir eins og flugur. Ekki er það nein furða að flutningsgjöld séu alltaf að hækka, það þurfa einhverjir að borga brúsann þegar bresku ferðaskrifstofurnar fara á hausinn. En vonandi tekst að sigla félaginu upp úr öldudalnum og að menn fari að einbeyta sér í rekstri Eimskipafélagsins og láti bresku ferðaskrifstofurnar í friði. Það er held ég öruggari rekstur að flytja gáma heldur en íhaldssama breska ferðamenn, gámarnir halda þó kjafti.

www.123.is/tobbivilla