Bæjarstjórn Vestmannaeyja óskar eftir framtíðarsýn ríkisvaldsins varðandi Surtsey og Surtseyjarstofu

21.Júlí'08 | 08:22

Surtsey

Á fundi bæjarstjórnar Vestmannaeyja þann 17 júlí síðastliðinn var samþykkt ályktun þar sem bæjarstjórnin óskar eftir framtíðarsýn frá ríkisvaldinu varðandi Surtsey og Surtseyjarstofu.

Í ályktun bæjarstjórnar segir m.a. að mikilvægt sé að endurskoða öll lög, reglugerðir og starfshætti sem eyjuna varða. Megin markmið slíkrar endurskoðunar og yfirferðar ætti að vera að tryggja að Surtsey sé umgengin af þeirri virðingu sem hún á skilið sem hluti af Vestmannaeyjum og einstakt náttúruverndarsvæði. Ennfremur vill bæjarstjórn Vestmannaeyja auka umsvif ferðaþjónustuaðila og vísindastarfs í tengslum við eyjuna í Vestmannaeyjum. Þá er það einnig ósk bæjarstjórnar að forræði Eyjamanna sjálfra yfir þessari yngstu eyju í Vestmannaeyjaklasanum verði aukið.

Greinargerð bæjarstjórnar um er eftirfarandi:
Heimsminjanefnd UNESCO samþykkti á fundi sínum 7. júlí í Québec í Kanada að setja Surtsey á heimsminjalistann á grundvelli vöktunar og rannsókna á þróun eyjunnar. Eru Vestmannaeyjar þar með fyrsti staðurinn á Íslandi sem fær viðurkenningu sem einstakt náttúrulegt undur sem þarf að vernda og gera hátt undir höfði með öllum tiltækum ráðum.
Heimsminjasamningur UNESCO frá árinu 1972 fjallar um verndun menningar- og náttúruarfleifðar heimsins. Menntamálaráðuneytið ber ábyrgð á framkvæmd samningsins fyrir Íslands hönd. Það hefur jafnframt umsjón með menningararfinum en umhverfisráðuneytið sér um náttúruminjar og náttúruvernd. Um leið er það óumdeilanlegt að Surtsey er hluti af Vestmannaeyjaklasanum og á forræði sveitarfélagsins sem slíkt rétt eins og aðrir hlutar sveitafélagsins.
Um leið og bæjarstjórn Vestmannaeyja metur mikils þau sóknarfæri sem slíkri viðurkenningu fylgja þá er hún einnig meðvituð um þá ábyrgð sem slíku fylgir. Með það í huga vill bæjarstjórn vanda áfram til verka í yfirvegaðri notkun og verndun náttúru Vestmannaeyjaklasans og þá ekki síst Surtseyjar.
Staðir á heimsminjaskránni draga gjarnan að aukinn fjölda ferðamanna þannig að mikilvægi viðkomandi staða eykst í þjóðhagslegu tilliti. Heimsminjaskráin er talin vera afar öflugt tæki til minja- og náttúruverndar ekki síður en til uppbyggingar vandaðrar ferðaþjónustu í hverju landi.
Vestmannaeyjabær hefur nú kynnt framtíðarsýn sína hvað varðar uppbyggingu á safna og menningarstarfi með stefnunni: "Söfn og menning í Vestmannaeyjum, heill heimur út af fyrir sig". Engum dylst að hugmyndir ríkisins um Surtseyjarstofu og flutning á sýningunni: "Surtsey, Jörð úr ægi" falla vel að hugmyndum Vestmannaeyjabæjar um gosminjasafnið Eldheima. Nú þegar stefnt er að byggingu Eldheima er afar brýnt að framtíðarsýn ríkisyfirvalda hvað Surtseyjarstofu varðar liggi fyrir og leitað verði leiða til að aðlaga slík áform að hugmyndum heimamanna.
Á sama hátt ber að ígrunda hvert hlutverk Surtseyjarstofu verður í almennri stjórnsýslu og verklagi við verndun og stjórnun Surtseyjar og hvaða leiðir verða farnar til að samþætta þarfir vísindamanna, heimanna og ferðaþjónustu.

 

 

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is