Sigurganga karlaliðs ÍBV heldur áfram

6.Júní'08 | 22:12

Bjarni Rúnar ÍBV

ÍBV tók á móti liði Fjarðarbyggðar í 5. umferð í 1. deild karla í knattspyrnu nú í kvöld. Enn á ný sýndi liðið yfir hverju það býr og situr liðið sem fastast í 1. sæti deildarinnar með fullt hús stiga, en þess má geta að liðið hefur enn ekki fengið mark á sig í deildinni.

Það var sannkölluð rjómablíða á Hásteinsvellinum í kvöld sem skemmdi ekki fyrir stemmningunni fyrir þessum fimmta deildarleik liðsins, enda var fjölmenni á vellinum í kvöld. Jafnræði var með liðunum til að byrja með, en Eyjamenn þó öllu hættulegri í sóknunum. ÍBV sótti þó í sig veðrið og á 42. mínútu fékk Bjarni Rúnar Einarsson sendingu fyrir utan teig sem hann tók á bringuna og smellti boltanum svo viðstöðulaust í fjærhornið, algjörlega óverjandi fyrir markmann Fjarðarbyggðar og þar við sat í hálfleik.

Í seinni hálfleik mættu Eyjamenn öllu ákveðnari til leiks en í þeim fyrri og ekki leið á löngu þar til þeir höfðu bætt við öðru marki, en þar var á ferð Andri Ólafsson á 49. mínútu þar sem hann fylgdi eftir skalla frá Antoni Bjarnasyni, 2 - 0. Aðeins einni mínútu síðar fékk Augustine Nsumba sendingu þar sem hann var einn og óvaldaður í vítateig andstæðinganna og kláraði hann færið af stakri prýði, vinstri fótar skot framhjá markverðinum. Það sem eftir lifði leiks skiptust lið á sóknum en ÍBV var þó öllu ákveðnari og leit út fyrir að austfirðingarnir væru búnir að gefast upp á tímabili. Þeir áttu hins vegar nokkrar góðar sóknir og björguðu Eyjamenn meðal annars einu sinni á marklínu. 3 - 0 urðu hins vegar lokatölur leiksins og sitja Eyjamenn sem fyrr segir í fyrsta sæti deildarinnar með 15 stig, en næst á eftir kemur Selfoss með 13 stig og svo í þriðja sæti er Stjarnan með 10 stig.

ÍBV
Byrjunarlið: Albert Sævarsson, Andri Ólafsson (Ingi Rafn Ingibergsson 76. mín), Matt Garner, Arnór Eyvar Ólafsson, Bjarni Hólm Aðalsteinsson, Augustine Nsumba (Gauti Þorvarðarson 79. mín), Egill Jóhannesson, Bjarni Rúnar Einarsson (Guðjón Ólafsson 70. mín), Anton Bjarnason, Þórarinn Ingi Valdimarsson, Matt Garner, Atli Heimisson.
Varamenn: Steinar Ernir Knútsson, Guðjón Ólafsson, Gauti Þorvarðarson, Ingi Rafn Ingibergsson, Elías Fannar Stefnisson.