Sanngjarn sigur á Hásteinsvelli

ÍBV voru mun sterkari til að byrja með og sóttu látlaust á mark Leiknismanna á fyrstu mínútunum. Atli Heimisson var mjög hættulegur í sókninni og gerði sig oft líklegan til að skora, en allt kom fyrir ekki. Það var ekki fyrr en á 30. mínútu að Atli kom heimamönnum verðskuldað yfir eftir sendingu frá Bjarna Rúnari Einarssyni. Leiknismenn vöknuðu til lífsins eftir markið og áttu nokkrar hættulegar sóknir í kjölfarið. Það voru hins vegar Eyjamenn sem skoruðu næsta mark á 41. mínútu, en það var dæmt af vegna rangstöðu. Þar átti Matt Garner frábæra sendingu inn fyrir vörnina, beint á Atla Heimisson sem sendi hann viðstöðulaust í netið. Atli var að vonum ósáttur við dóminn en lítið þýðir að þræta við dómarann.

Seinni hálfleikurinn fór mun hægar af stað en sá fyrri og ekki jafn mikill hraði. Atli Heimisson skoraði sitt annað mark á 64. mínútu, en þá átti hann skot sem fór í varnarmann Leiknis og þaðan í stórum boga yfir markmann Leiknis. Ekki fallegasta mark sem litið hefur dagsins ljós en telur samt sem áður. Staðan orðin 2 - 0 fyrir ÍBV. Leiknismenn fengu gullið tækifæri til að minnka muninn á 85. mínútu þegar dómarinn dæmdi hendi á Pétur Runólfsson innan teigs og vítaspyrna því staðreynd. Albert Sævarsson gerði sér þó lítið fyrir og varði spyrnuna og þar við sat 2 - 0 sigur ÍBV staðreynd, en liðið situr eins og er í fyrsta sæti 1. deildar. Það er því ljóst að ÍBV ætlar að byrja þetta tímabil af hörku og setja markið hátt, enda með mannskap sem á að geta skilað liðinu í Landsbankadeildina á ný.

ÍBV
Byrjunarlið: Albert Sævarsson, Arnór Ólafsson (Egill Jóhannsson 65. mín), Andri Ólafsson, Andrew Mwesigwa, Matt Garner, Augustine Nsumba (Þórarinn Ingi Valdimarsson 73. mín), Pétur Runólfsson, Italo (Anton Bjarnason 78. mín), Ingi Rafn Ingibergsson, Bjarni Rúnar Einarsson, Atli Heimisson
Varamenn: Elías Fannar Stefnisson, Anton Bjarnason, Þórarinn Ingi Valdimarsson, Egill Jóhannsson & Steinar Ernir Knútsson.
Gul spjöld: Bjarni Rúnar, Arnór & Pétur