Vestmannaeyingar einir eftir

18.Apríl'08 | 07:03

Bakkafjöruferja

TILBOÐ í rekstur nýrrar Vestmannaeyjaferju voru opnuð í gærmorgun og bárust tvö tilboð í verkið, en fjórum aðilum hafði verið boðið að skila inn tilboðum. Samkvæmt upplýsingum Morgunblaðsins ákváðu Eimskip og Nýsir hins vegar að skila ekki inn tilboðum og skiluðu Samskip og félag í eigu Vinnslustöðvarinnar og Vestmannaeyjabæjar ein inn tilboðum.

Tilboð Samskipa var ekki talið uppfylla tæknileg skilyrði útboðslýsingar og stóðu Vestmannaeyingar því einir eftir. Kostnaðaráætlun í útboðslýsingu gerði ráð fyrir því að kostnaður við verkið, sem felur í sér m.a. byggingu, eða kaup á ferjunni, yrði um 10,2 milljarðar króna. Megintilboð Vestmannaeyinga hljóðaði hins vegar upp á um 16,3 milljarða króna. Þá fylgdu tilboðinu fimm frávikstilboð og var lægsta frávikstilboðið upp á um tólf milljarða króna.

Forval á þeim sem bjóða máttu í verkið fór fram í október sl. og þá var verkið formlega boðið út í lok desember 2007.

Niðurstaðan kom ekki á óvart
Sigurður Áss Grétarsson, forstöðumaður Siglingamálastofnunar, segir niðurstöðuna ekki hafa komið á óvart. Stofnunin hafi vitað af því fyrirfram að tveir aðilar myndu ekki skila inn tilboði og þá sé ekki óvanalegt að tilboð séu yfir kostnaðaráætlun.

„Greinilegt er á tilboði Vinnslustöðvarinnar og Vestmannaeyjabæjar að fjármagnskostnaður vegur þungt í útreikningum þeirra og því greinilegt að lánsfjárhremmingar hér heima og erlendis hafa hér áhrif. Má sem dæmi nefna að í einu frávikstilboðinu er gert ráð fyrir að bjóðandi fái einn milljarð greiddan við afhendingu ferjunnar og lækkar þá heildartilboðið í um fjórtán milljarða. Annað frávikstilboð gerir ráð fyrir tveggja milljarða greiðslu við afhendingu og um 12 milljarða heildargreiðslu. Undirstrikar þetta hinn mikla fjármagnskostnað sem ég nefndi áður."

Sigurður segir ekki ljóst hvert framhaldið verði en almennt sé meginreglan sú að taka ekki tilboðum sem séu meira en 10% yfir kostnaðaráætlun. Hins vegar sé mögulegt að hægt sé að ná verðinu niður í samningaviðræðum við Vestmannaeyingana, eða að málið verði leyst með öðrum hætti, t.d. með því að bjóða verkið út aftur. „Hins vegar er líklegt að nýtt útboð verði með öðrum hætti þar sem tímaskortur fer að hrjá okkur þegar fram líða stundir. Staðan sem upp er komin er óheppileg fyrir verkefnið en hún er hvorki óvænt né óviðráðanleg."

Aukið forræði Eyjamanna

Sigurður segir ekki fordæmislaust að tilboð séu yfir kostnaðaráætlun en það gerist í um fjórðungi tilvika. Niðurstaða í slíkum málum hafi hins vegar alltaf fengist, annaðhvort með samningaviðræðum eða með því að bjóða verk út að nýju. „Það sem gerir þetta verkefni kannski frábrugðið öðrum er að tilboðsgjafar virðast vera áhættufælnari en venjulega en það er ef til vill í eðli verksins fólgið."

Elliði Vignisson, bæjarstjóri í Vestmannaeyjum, segir að farið hafi verið yfir tilboðin í Vestmannaeyjaferjuna á fundi hjá Ríkiskaupum í gær þar sem tilboðin voru opnuð. Þar hafi verið mættir fulltrúar bjóðenda og verksala, þ.e. Ríkiskaupa, Siglingamálastofnunar og heimamanna. Fulltrúar aðila hafi ákveðið að funda aftur í dag, föstudag, til þess að freista þess að ná saman.

„Ég er með tvo fætur við þetta borð, annars vegar sem bæjarstjóri í Vestmannaeyjum, og þar með fulltrú langstærsta hagsmunaaðilans, og hins vegar fulltrúi bjóðenda. Við erum að taka þátt í þessu vegna þess að krafa íbúa í Vestmannaeyjum hefur verið sú að við freistum þess að fá aukið forræði yfir samgöngunum. Og þetta er viðleitni til þess. Hvað það varðar er ég afar ánægður með að vera nú við samningaborðið. Það reynir á lipurð beggja aðila en ég er sannfærður um að samgöngur til Vestmannaeyja muni koma til með að stóreflast. Það er lykilatriðið í þessu og það væri bara ánægjanlegur aukabónus ef við Vestmannaeyingar myndum sjálfir hafa töglin og hagldirnar."

Hefði mátt skoða betur
Halldór Kristmannsson, framkvæmdastjóri samskiptasviðs Eimskips, segir að nokkrar ástæður hafi legið að baki þeirri ákvörðun félagsins að taka ekki þátt í útboðinu. Samningstíminn sé langur og Eimskip hafi talið að í verkefninu væru of margir óvissuþættir sem sneru m.a. að hönnun og smíði ferjunnar og rekstri hafnarinnar á Bakka. Þá hafi félagið talið að reksturinn á ferjunni færi vel í höndum heimamanna en Eimskip hafi átt gott samstarf við þá meðan félagið hafi séð um rekstur Herjólfs.

Varðandi málið í heild sinni og umfjöllun undanfarnar vikur segir Halldór það ekki koma sér á óvart að skiptar skoðanir séu um þetta verkefni. „Frekari uppbygging á hafnarsvæðinu í Eyjum hefði bæði getað verið mikil lyftistöng fyrir ferðaiðnað í Eyjum og fer það einnig saman við hagsmuni flutningafyrirtækja sem hafa þar viðkomu. Hugsanlega hefði mátt skoða þann kost betur," segir Halldór.

Kristján Möller samgönguráðherra vildi í gær ekki tjá sig um þetta mál á þessu stigi þar sem hann hefði ekki fengið kynningu á því.

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Lumar þú á grein?

15.Febrúar'18

Endilega sendu okkur hana á eyjar@eyjar.net. Eyjar.net - fyrir alla. 

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.