Alveg ótrúlegur dagur

6.Apríl'08 | 06:29

Hemmi Hreiðars Hermann Hreiðarsson

Portsmouth, lið Hermanns Hreiðarssonar, spilar til úrslita í ensku bikarkeppninni í ár eftir sigur á WBA, 1-0, í undanúrslitum á Wembley. Það var Nwankwo Kanu sem skoraði eina mark leiksins. Andstæðingurinn í úrslitunum verður 1. deildarlið en Barnsley og Cardiff mætast í síðari undanúrslitaleiknum í dag

. Þetta er í fyrsta sinn síðan 1939 sem Portsmouth kemst í úrslit.
„Þetta var alveg meiriháttar. Þessi dagur er búinn að vera alveg ótrúlegur. Maður er ekkert búinn að ná sér niður enn þá," sagði Hermann við Fréttablaðið eftir leik í gær en hann sagði stemninguna hafa verið lyginni líkasta allan daginn.

„Þegar við komum keyrandi að vellinum snemma voru þúsundir manna að taka á móti okkur. Annar helmingurinn var að fagna okkur og hinn helmingurinn kastaði bjórdósum í rútuna. Þetta var æðislegt," sagði Hermann léttur en hann segir ólíkt skemmtilegra að vera að keppa um titil en falla líkt og hann hefur lent í fjórum sinnum á ferlinum.
„Bikarinn er svakalega skemmtileg keppni og við ætlum okkur alla leið. Ef við spilum eins og menn í úrslitunum þá verður það góður dagur," sagði Hermann sem meiddist í síðasta leik liðsins en gat samt spilað.
„Meiðslin háðu mér ekkert í leiknum en ég er ekkert sérstakur núna eftir leikinn."
Hermann og félagar segjast ekki vera búnir að segja sitt síðasta orð í deildinni en Hermann segir að þeir muni bíta frá sér í þeim leikjum sem eftir eru.
„Við ætlum að taka inn eins mörg stig og mögulegt er og svo sjáum við hverju það skilar okkur. Það eru 18 stig í pottinum og við ætlum að taka lungann af þeim stigum," sagði Hermann að lokum en hann bjóst ekki við miklum fagnaðarlátum um kvöldið enda leikur næsta þriðjudag. Harry Redknapp, stjóri Portsmouth, var svo æstur á leiknum að hann steingleymdi að veðja á hesta í stórri keppni sem fór fram í gær en það klikkar aldrei hjá stjóranum. Nígeríumaðurinn Kanu var eðlilega kátur með markið og sigurinn.
„Þetta var auðvelt færi sem ég gat ekki klúðrað," sagði Kanu en hann lék áður með WBA. „Þeir byrjuðu leikinn betur en við en Sol, Sylvain, Glen og Hermann voru frábærir í öftustu línu."

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.