Hádegisverður með flottu útsýni á Nítjándu

4.Apríl'08 | 06:15

Siggi Gísla

Ég er alsæll með afraksturinn því hér hefur tekist að skapa þann hlýleika sem að var stefnt og hér er ég kominn með einvalalið starfsfólks, sem ég í reynd átti svo sem ekki von á að ná í. Við lítum því bara björtum augum til framtíðarinnar enda má segja að þetta sé stærsta veitingaverkefni sem ráðist hefur verið í hér á landi," segir Sigurður Gíslason, yfirmatreiðslumeistari og framkvæmdastjóri Veisluturnsins við Smáratorg.
Veisluturninn er á tveimur efstu hæðum Turnsins, stærstu byggingu landsins, í samtals 1.550 fermetra stóru rými og getur skipst niður í allt að sex sali, þrjá á hvorri hæð. Salirnir taka samtals allt að 450 manns í sæti, þar af getur hádegisverðarstaðurinn tekið við um 200 manns í hverju hádegi.

„Við ætlum okkur að gera út á hádegistraffíkina með þessum nýja veitingastað, sem hlotið hefur nafnið Nítjánda þar sem við erum hér á nítjándu og næstefstu hæð Turnsins," segir Sigurður og bætir við að veitingastaðurinn þjóni auk þess um eitt hundrað starfsmönnum nokkurra fyrirtækja í hádeginu.

Góð aðstaða er til funda- og ráðstefnuhalds í Turninum, sem er með einum þeim fullkomnasta funda- og tækjabúnaði sem völ er á, að sögn Sigurðar. Á 20. hæðinni eru veislusalirnir með sex metra lofthæð, setustofu og bar, sem hlotið hefur heitið T20. Salir 20. hæðarinnar eru eingöngu leigðir út, en hádegisverðarstaðurinn og barinn, sem opnaður verður innan fárra daga og opinn verður fyrst um sinn á fimmtudags-, föstudags- og laugardagskvöldum, verða opnir almenningi.

Hönnun var í höndum arkitektsins Sigurðar Gústafssonar. Húsgögn og innréttingar eru úr dökkbæsaðri valhnotu, stólar klæddir ítölsku leðri og mikið hefur verið lagt upp úr réttri lýsingu, sem hægt er að breyta eftir efnum, ástæðum og tilefni. Sjálfur segist Sigurður hafa hannað eldhúsið, þar sem matreiðslumeistarar una glaðir við sitt, enda eru þeir örugglega með flottara útsýni en margir kollegar annars staðar.

Á Nítjándu verður í boði hlaðborð í hverju hádegi á virkum dögum til að byrja með, en til stendur að bjóða upp á „brunch" um helgar þegar fram líða stundir. „Hlaðborðið okkar samanstendur af tíu til fimmtán tegundum af salötum, tvenns konar súpum og brauði, sem bakað er á staðnum, sushi, wokréttum, einum heitum fiskrétti og einum heitum kjötrétti," segir Sigurður.

Þá eru uppi hugmyndir um að bjóða hópum upp á sýnikennslu í matargerð enda býður öll aðstaða upp á slíkt fyrirkomulag. „Ég gæti trúað að það gæti orðið vinsælt til dæmis hjá saumaklúbbum eða fyrirtækjahópum að panta sér sýnikennslu í sushi-, konfekt- eða kökugerð, slaka á yfir hvítvínsglasi og fá svo kannski makana með í mat um kvöldið," segir Sigurður, sem gaf Daglegu lífi sýnishorn af hádegisverðarmatseðlinum í formi tveggja ljúffengra salatuppskrifta.

Bulgursalat með gúrkum,

ólífum og fetaosti

1 bolli bulgur

salt

1¼ bolli sjóðandi vatn

¼ bolli fínt saxaður rauðlaukur

3 msk. sítrónusafi

2 msk. saxað ferskt kóríander

1 msk fínt saxað kapers

1 fínt saxaður hvítlauksgeiri

¼ bolli extra virgin-ólífuolía

½ gúrka, skræld, fræhreinsuð

og skorin í teninga

¼ bolli kalamata-ólífur

ferskur mulinn hvítur pipar

60 g mulinn fetaostur

Bulgur sett í skál ásamt heitu vatni, plastfilma sett yfir og látið standa í 20 mín. Rauðlauk, sítrónusafa, kóríander, hvítlauk og kapers blandað saman. Ólífuolían sett út í ásamt gúrkum og ólífum. Hrært í bulgurinu með gaffli og það sett út í dressinguna. Kryddað með salti og pipar eftir smekk og fetaostinum sáldrað yfir réttinn. Borið fram með romaine-salati.

Heitt kryddað nautasalat

með engifer

500 g nautafilet, steikt medium og kælt

200 g snjóbaunir, forsoðnar og kældar

100 g baunaspírur

1 fínt skorinn rauðlaukur

¼ bolli cashew-hnetur

Chili-dressing

1 tsk. fínt rifin engiferrót

2 tsk. rauð chili, fínt söxuð

¼ bolli sítrónusafi

2 msk. sykur

1 tsk. fiskisósa

Til að laga dressinguna setjið þá engifer, chili, sítrónusafa, sykur og fiskisósu saman í skál og pískið saman. Nautakjötið er svo skorið fínt og sett í skál með snjóbaunum, baunaspírum, rauðlauk og hnetum. Dressing sett yfir.

www.turninn.is 

Afmælisár Vestmannaeyjabæjar - Dagskrá

15.Apríl'19

Í ár fagnar Vestmannaeyjabær 100 ára kaupstaðarafmæli. Af því tilefni er fjölbreytt dagskrá allt árið. Hér má skoða dagskrá ársins.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is. Söluþóknun aðeins 1,1%

Ég vil gerast félagsmaður í Krabbavörn

17.September'19

Hver félagsmaður skiptir félagið miklu máli. Ef þið hafið áhuga á að gerast félagsmenn þá endilega fyllið út eyðublaðið (smelltu hér). Krabbavörn er góðgerðarfélag sem styður við og styrkir þá félagsmenn sem greinast með krabbamein og eiga lögheimili í Vestmannaeyjum. Ár hvert leita u.þ.b. 10 nýir einstaklingar til félagsins eftir styrkjum og um 25 einstaklingar fá einhverskonar fjárstuðning frá félaginu á hverju ári. Árgjaldið er aðeins kr. 2500,-

Bók Bjarna í Bónus

2.Desember'19

Nú er hægt að kaupa bók Bjarna Jónassonar „Að duga eða drepast” í Bónus, Vestmannaeyjum. Að duga eða drepast lýsir lífshlaupi Bjarna Jónassonar, flugmanns og útvarpsstjóra í Vestmannaeyjum.