Hélt að þetta væri búið

31.Mars'08 | 07:14

,,Ég var eiginlega alveg viss um að hásinin hefði slitnað og að tímabilið væri búið hjá mér en sem betur fer reyndist svo ekki. Það opnaðist skurður fyrir ofan hásinina og ég var saumaður með fjórum sporum strax eftir leikinn og ég er bjartsýnn á að geta spilað á Wembley á laugardaginn og ætla mér það," sagði Eyjamaðurinn Hermann Hreiðarsson, leikmaður Portsmouth, við Morgunblaðið í gær.

Hermann varð að hætta leik gegn Wigan eftir klukkutímaleik þegar hann lenti í harkalegri tæklingu með fyrrgreindum afleiðingum. Hermann brást mjög illa við, sló hnefanum í grasið og bölvaði enda sannfærður um að meiðslin væru alvarlegs eðlis og draumurinn um að spila á Wembley fyrir bí en Portsmouth mætir 1. deildarliði WBA í undanúrslitum ensku bikarkeppninnar á laugardaginn.

,,Takkinn fór alveg inn í skinnið og satt best að segja leit þetta ekki vel út. Ég reif mig úr skónum því ég hélt að hásinin væri komin upp í hné eða svo. Hún virðist hins vegar hafa sloppið og sem betur fer því það kemur ekki til greina að missa af leiknum á Wembley," sagði Hermann en Portsmouth vann sannfærandi 2:0 sigur á Wigan og er í sjötta sæti deildarinnar.

Hermann segir að undirbúningurinn fyrir leikinn á móti WBA hafi byrjað strax í gær. ,,Það er mikill spenningur hjá okkur leikmönnum og stuðningsmönnum fyrir leikinn. Við vitum að þó þó svo að WBA sé deild neðar en við þá verður þetta gríðarlega erfiður leikur og það verður ekkert vanmat hjá okkur," sagði Hermann.

Portsmouth stendur vel að vígi í deildinni og Evrópusæti er innan seilingar hjá liðinu. ,,Þetta lítur bara vel út og nú erum við farnir að vinna heimaleikina sem er svo mikilvægt. Þetta var fimmti sigurleikurinn í röð á heimavelli og ef við höldum rétt á spöðunum þá náum við Evrópusæti og vinnum vonandi bikarinn líka," sagði Eyjamaðurinn sem hefur átt afar góðu gengi að fagna með Portsmouth á leiktíðinni.