Árni Johnsen rassskellir ríkisstjórnina

9.Mars'08 | 09:15

Guðni Ágústsson

ÞAÐ má Árni Johnsen að eiga að hann þorir og lætur ekki flokk sinn stöðva sig ef mikið liggur við. Hann hefur það fram yfir flesta þingmenn sína að hann er á ferðinni og heyrir byggðanna bænir.

Við framsóknarmenn lögðum mikla vinnu í að greina afleiðingar þess á sjávarbyggðirnar að skera niður þorskveiðiheimildirnar. Við gerðum okkur grein fyrir því að mikill niðurskurður var óhjákvæmilegur. Við studdum okkur þó við ICES, Norður-Atlantshafsfiskveiðiráðið, sem ráðlagði að heildaraflamark þorsk fyrir almanaksárið 2008 skyldi vera 152 þúsund tonn en sú ráðgjöf byggir á þeirri veiðireglu sem innleidd var árið 1995. Við vorum og erum þeirrar skoðunar að Hafrannsóknastofnun hafi með tillögum sínum gengið lengra en hyggilegt væri af mörgum ástæðum.

Þetta mátum við framsóknarmenn heppilegra en 130 þúsund tonna ákvörðun ríkisstjórnarinnar sem við töldum vera rothögg á stöðu margra sjávarútvegsfyrirtækja og sjávarþorpa um allt land. LÍÚ lagði svo til 160-165 þúsund tonna þorskkvóta og rökstuddi það með efnahagslegum og vísindalegum sjónarmiðum.

Ein rök gegn svo hörðum niðurskurði sem raunin varð voru þau að erfitt yrði að ná meðafla. Önnur rök voru þau að brottkast á fiski myndi aukast á ný og þriðju rökin sem vógu þungt voru þau að það væri alveg eins hægt að byggja upp sterkan stofn og veiða 150 þúsund tonn á ári eins og 130 þúsund tonn. Það eru fleiri í sjónum sem ganga á þorskstofninn en veiðimennirnir.

Við fullunnum síðan tillögur um markvissar mótvægisaðgerðir og lögðum þær fram. Sannleikurinn er sá að mótvægisaðgerðir ríkisstjórnarinnar voru og eru móðgun við fólkið sem vinnur í sjávarútvegi. Að taka á einu bretti 20 milljarða út úr atvinnuveginum og tala síðan eins og flýting á vegaframkvæmdum eða það að mála hús og flytja fáein störf til leysi þennan vanda er óskiljanlegt. Ekki síst í ljósi þess að stjórnarflokkarnir eiga tugi þingmanna, vel hæft fólk um allt land, og mjög reynda ráðherra, þar af tvo sjávarútvegsráðherra, núverandi og fyrrverandi. Þetta fólk á að vita betur.

Nei, það er svo Árni Johnsen sem tekur á sig rögg og talar við 27 sveitarstjóra og/eða bæjarstjóra og kemst að sömu niðurstöðu og við framsóknarmenn um að niðurskurður þorsksins og háðulegar mótvægisaðgerðir séu rothögg. Við framsóknarmenn sögðum strax að þetta myndi þýða það að nokkur hundruð sjómenn myndu ganga í land og skip verða seld burtu. Fyrirtækjum mun í kjölfarið fækka og veiðiheimildir færast á færri hendur. Fiskverkafólk mun tapa vinnu sinni og sveitarfélög missa af miklum tekjum.

Það var dapur dagur í haust þegar ríkisstjórnin kynnti mótvægisaðgerðirnar hinn 12. september, að sjávarútvegsráðherra fjarverandi. Það hefur alltaf verið mér umhugsunarefni hvar hann var þann dag. Ætli hann hafi skammast sín?

Viðbrögð fjármálaráðherra voru þó enn daprari eftir að samþingmaður hans hafði lesið Sjálfstæðisflokknum pistil sinn og kallað mótvægisaðgerðirnar smáskammtalækningar. Líklega er svo til of mikils ætlast að kalla eftir ábyrgum ræðum frá Samfylkingunni um þessi mál. Það sýndi alla vega málflutningur þeirra og viðbrögð við ræðu þessa samstarfsmanns þeirra í stjórnarsamstarfi að þeir kunna ekki að skammast sín.

Höfundur er formaður Framsóknarflokksins.

Viðhorfskönnun til samgangna og bæjarmála

2.Nóvember'18

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2018.

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.