Tillaga um aukningu stofnfjár lögð fyrir fund stofnfjárhafa Sparisjóðsins í næstu viku

2.Október'07 | 09:16

Sparisjóðurinn

Í næstu viku verður fundur stofnfjárhafa Sparisjóðs Vestmannaeyja og mun stjórn Sparisjóðsins leggja það til að stofnfjárhöfum verði fjölgað. Miðað við þá staðreynt að fjárfestar vilji kaupa núverandi stofnfé í Sparisjóðnum þá má gera ráð fyrir því að mikil eftirspurn verði eftir því aukna stofnfé sem gefið verður út ef tillagan verður samþykkt.

www.eyjar.net sendu nokkrar spurningar á Ólaf Elísson sparisjóðsstjóra varðandi málefni stofnfjáreigenda.

Hvað eru stofnfjárhafar margir í Sparisjóði Vestmannaeyja?
Stofnfjáreigendur eru 70 og eingöngu einstaklingar , flestir búsettir í Vestmannaeyjum.
 
Hversu mikið greiddu þeir fyrir sinn stofnfjárhlut?
Hver  stofnfjárhlutur  er nú eftir síðasta aðalfund 55 þús.  kr. að nafnverði.  Einstaklingarnir greiddu mun lægri fjárhæð fyrir hlutinn, mismunandi eftir því hvenær þeir gerðust stofnfjáreigendur.
 
Hvernig eru stofnfjárhafar valdir?
Þekki ekki söguna nægjanlega vel, en stjórn sjóðsins gerði tillögu til aðalfundar um fjölgun stofnfjáreigenda hverju sinni.  Síðast var fjölgað í hópi stofnfjáreigenda á aðalfundi árið 1999.
 
Hver er munurinn á stofnfjárhafa og hluthafa?
Í lögum eru ákvæði um að sparisjóðir/sjálfseignarstofnun megi ekki selja stofnfjárhluti í sjálfum sér á öðru verði en nafnverði (þ.e. á genginu 1), þ.e. stofnfjáreigandinn kaupir eingöngu hlutdeild í stofnfé sparisjóðsins en ekki öðru eigin fé hans.  Hlutafélag selur hlutafé í sjálfu sér á metnu gengi í samræmi við eiginfjárstöðu sína, þ.e. hluthafinn kaupir ákveðan hlutdeild í öllu eiginfé hlutafélagsins.  Það er því í flestum tilvikum sem stofnfjáreigendur í sparisjóði hafa greitt langtum lægra fyrir stofnfjárhluti en eiginfjárstaða sparisjóðs segir til um, enda er litið svo á og lögin kveða á um að varasjóður sparisjóðsins (annað eigið fé en stofnfé) er ekki eign stofnfjáreigenda eins og gildir um eigið fé hlutafélaga  sem  er í heild sinni eign hluthafanna.
 
Er eitthvað sem kemur í veg fyrir að stofnfjárhafi selji sitt stofnfé?
Ekki annað en leiðir af lögum og samþykktum sparisjóðsins.  Stjórn sparisjóðs þarf í öllum tilvikum að samþykkja framsal stofnfjár.  Það eru ýmis sjónarmið sem stjórn þarf að hafa í huga við framsal stofnfjár, t.d. að ekki myndist virkur eignarhlutur o.fl.
 
Eru líkur á því að stofnfjárhöfum verði fjölgað á næstunni?
Verði tillaga stjórnar Sparisjóðsins um verulega aukningu stofnfjár samþykkt á fundi stofnfjáreigenda sem haldinn verður í næstu viku, má búast við að hún leiði af sér nokkra fjölgun stofnfjáreigenda á næstu misserum og að einhver viðskipti með stofnfjárhluti eigi sér stað.  Hvenær það verður get ég ekki sagt til um, en í nær 65 ára sögu Sparisjóðsins hefur framsal stofnfjárhluta innan sjóðsins verið nær eingöngu bundið við framsal innan sömu fjölskyldu.
 
Eru í gildi reglur um hámarks eignarprósentu stofnfjárhafa í Sparisjóðnum?
Í dag eru allir stofnfjárhlutar jafnir, allir 70 stofnfjáreigendurnir eiga jafnan hlut.   Hámarks eign hvers stofnfjáreiganda er því 1,4%.  Stjórn sparisjóðsins hefur lagt til við fund stofnfjáreigenda sem haldinn verður í næstu viku m.a. að hámark hvers stofnfjáreiganda af stofnfé verði hækkað í 5% ,  samhliða verulegri hækkun stofnfjár.

 

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Viðhorfskönnun til samgangna og bæjarmála

2.Nóvember'18

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2018.