Byggjum barnvænar Eyjar

22.Ágúst'07 | 22:24

Eygló Harðardóttir

Eyjar.net heldur áfram að heyra í valinkunnum Eyjamönnum varðandi hvaða möguleika þeir sjá í stöðunni með söluhagnaðinn af Hitaveitu Suðurnesja.

Að þessu sinni heyrðum við í Eygló Harðardóttur varaþingmanni Framsóknarflokksins í Suðurkjördæmi og fengum að heyra hvaða hugmyndir hún hefur varðandi söluhagnað HS.

Spurningin er sú sama:
Ef þú værir bæjarstjórnin hvað myndirðu leggja til að gert yrði við þessa 3.6 milljarða?

Að sjálfsögðu skiptir mestu máli að fara vel yfir skuldastöðu bæjarins, greiða upp þau lán sem eru óhagstæð og koma skikki á lífeyrissjóðsmál bæjarstarfsmanna.

Að því loknu verða bæjarfulltrúarnir okkar að skoða hvaða verkefni eru skylduverkefni bæjarins og hvaða verkefni er valkvæm.  Það hefur alltof oft verið þannig að peningar bæjarins hafa farið í verkefni sem eru raunar valkvæm líkt og íþróttahúsið í stað verkefna sem eru skylduverkefni sveitarfélaga skv. lögum. 

Í viðtali við eyjar.net talaði Elliði Vignisson, bæjarstjóri um ýmis verkefni sem liggja fyrir í þriggja ára áætlun bæjarins s.s. menningarhús, nýtt knattspyrnuhús og nýja skipalyftu.  Síðast þegar ég athugaði hver væru skylduverkefni sveitarfélaga þá stóð ekki orð um að sem flestir yrðu að geta iðkað knattspyrnu á veturna.  Skylduverkefni sveitarfélags eru einna helst rekstur grunn- og leikskóla.

Undanfarin ár hefur stefnan verið að draga úr þjónustu á þessu sviði.  Grunnskólinn var sameinaður, leikskólinn að Rauðagerði lagður niður og gjaldskrá á mat staðið í stað þrátt fyrir lækkun virðisaukaskatts á mat. Þetta hefur gerst á sama tíma og önnur sveitarfélög hafa verið að auka þjónusta. Fjöldi sveitarfélaga býður upp á gjaldfrjálsan leikskóla fyrir 5 ára börn, og stefna að því að allur leikskólinn verði gjaldfrjáls. Aðrir hafa aukið þjónustan með því að taka börn inn yngri í leikskóla eða boðið upp á heilsdagsvistun að lokinni kennslu. 

Í Fréttum í vikunni var grein eftir Önnu Rós Hallgrímsdóttur sem var að flytja til Vestmannaeyja ásamt syni á leikskólaaldri.  Í samantekt um kostnað vegna leikskólapláss á milli Vestmannaeyja, Reykjavíkur, Kópavogs, Akureyrar, Egilsstaða og Árborgar kom í ljós að barnafjölskyldur í Eyjum eru að borga langhæsta gjaldið fyrir leikskólaplássið.  Þar var sýnt svart á hvítu hversu mjög Vestmannaeyjabær hefur dregist aftur úr í þjónustu við barnafjölskyldur.  

Sama tel ég að gildi um þjónustu við bæði eldri borgara og hinn almenna íbúa  Ég myndi því vilja sjá bæjarfulltrúana með bæjarstjórann í broddi fylkingar rétta úr kútnum hvað þetta varðar og spyrja sig hvað muni nýtast almennum bæjarbúum best: Lækkun matar sem seldur er á vegum bæjarins eða smíði á nýrri skipalyftu? Gjaldfrjáls leikskóli eða tómt knattspyrnuhús til minningar um að börnunum fækkar í sveitarfélaginu?

Ég vil sjá að við nýtum söluhagnaðinn til að búa vel að komandi kynslóðum og að við getum staðið áfram á því fastari en á fótunum að hvergi sé betra að ala upp börn en einmitt í Vestmannaeyjum. 

eyjar.net þakkar Eygló kærlega fyrir svarið

Segðu okkur þína skoðun á þessum pistli hér: http://eyjar.net/spjall/viewtopic.php?t=29

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.